Diahuebs ultimo, fundadornan di RAIZ, Sr.Ursell Arends como tambe Sr. Tai-Foo Lee, compaña pa e miembro di mas nobo di e movimento, Sr. Giovanni Jacobs, a haci un bishita di cortesia na e oficina di VNO riba L.G. Smith Boulevard.
Algun tempo atras caba, VNO a extende un invitacion na e movimento nobo y diahuebs atardi, dia 7 di december, RAIZ a duna oido na esaki.
A discuti ariba diferente topico, incluyendo esnan mas relevante y actual manera e situacion financiero di pais Aruba como tambe e protocol firma recientemente cu Hulanda. A toca e tema di naturalesa cual ta vincula na e ley di Moratorio cu RAIZ ta desea di mira vigente. Tambe a discuti tocante integridad di nos aparato gubernamental den su totalidad y e cumplimento di esaki den practica y otro temanan cu ta preocupa e movimento manera esun di nos economia local.
E reunion a bay den bon ambiente y tabata uno hopi interesante unda por a intercambia pensamento riba varios topico cu ta biba den henter nos comunidad.
Pa Sr. Giovanni Jacobs e encuentro aki tabata su prome participacion na un acto oficial como miembro nobo di RAIZ, despues di ta colaborando activamente pa basta tempo caba cu e movimento.
Sr. Jacobs ta labora na Dr. Horacio Oduber Hospital como technico specializa den cardiologia y tin un postgrado di ley ariba e materia di ley civil.
Movimento RAIZ ta yama bon bini na Sr. Jacobs y ta gradicie pa e confiansa cu el a deposita den e movimento politico creciente aki.
