Diaranson ultimo, lider di RAIZ, Sr. Ursell Arends como tambe Sr. Raymond Kamperveen, compaña pa e miembro di mas nobo di e movimento, Sr. Giovanni Jacobs, a haci entrega di e conteo oficial di cantidad di firma colecta pa stop e construccion descontrola di mas hotel y condominium na Presidente di Parlamento, Sr. J. Thijsen.
Ariba 30 di september RAIZ a haci un yamada pa pueblo firma un peticion pa asina sostene e introduccion di un moratorium riba hotel, timeshare y condominium nobo. E firmantenan di e peticion aki ta haci un yamada urgente na Gobernador, Gobierno y Parlamento di Aruba pa:
- Introduci un moratorium inmediatamente riba hotel,timeshare y condominium;
- Implementa, manera recomenda pa nos institutonan di turismo, un “high value low impact” tourism policy por medio di un ley;
- Regula, controla y limita e candidad di actividadnan turistico (deporte acuatico, huurmento di UTV’s, waterparks, restaurants etc.)
Te cu diaranson 12 di December 2018, un cantidad considerabel di nos pueblo – sumando un total di 7347 persona – a firma e peticion pa introduccion di moratorium segun declaracion di Notaris Rodriguez-Taekema.
Pa ricibi respet di pueblo, mester duna pueblo respet. RAIZ a priminti comunidad di Aruba y awor e ta cumpli tambe. “Nos por wak patras y encontra un aña unda RAIZ tabata basta activo apesar di ta un partido politico pafor di parlamento,” segun lider di e movimento, sr. Arends. “Pueblo por ta trankil, paso RAIZ ta un partido luchador cu lo sigui opera sea dilanti of patras di e cortina, semper na beneficio di nos hendenan, di nos isla, prome cu tur cos. ”
Recientemente por a tuma nota cu nos Minister di Desaroyo Teritorial, Infrastructura y Medio Ambiente a tuma e decision pa introduci un ‘voorbereidingsbesluit’ riba e ROP cual tambe ta incera moratorium riba hotel. RAIZ ta aplaudi e decision aki y ta spera cu di berdad un moratorium riba hotel ta parti di e ROP nobo, anto uno cu lo funciona debidamente y cu NO wordo debilita pa excepcionnan politico, manera e caso di p.e. St Regis Hotel. Si gobierno di Aruba kier introduci un moratorium riba hotel, e ora e mester pone pia abou pa esaki realmente sosode, sin basila y sin ningun excepcion.
