MOU firma no ta cumpli cu nos Comptabiliteitsverordening

MOU firma no ta cumpli cu nos Comptabiliteitsverordening

Den nos posicion como sirbido di pueblo, RAIZ a logra obtene un copia di e MOU (click pa download documento) cu a ser firma entre diferente compania y Land Aruba pa loke ta trata e proyecto di St. Regis Aruba Resort, Casino, SPA and Residences. Como partido politico serio, nos a analisa e MOU cu nos Comptabiliteitsverordening. Mirando cu nos kier ta sigur cu esaki ta cumpli cu nos leynan, nos finansas publico y tambe etica y moralidad.

Mirando e echo cu minister a señala cu RAIZ no ta den gobierno y tampoco den parlamento, kizas nos informacion por ta incompleto, lagando e pregunta: kico mas e ora falta?

Loke nos a constata, ta lo siguiente;

1. Articulo 14, 17.2 y 17.3 no ta cumpli cu nos Comptabiliteitsverordening
2. Ningun articulo den nos Comptabiliteitsverordening ta permiti loke e tres articulonan aki den e dicho MOU ta prescribi.
3. Tur fondo colecta door di gobierno MESTER ta parti di “Algemene Middelen” cu esaki fondonan mester bay den begroting. For di begroting Staten/Parlamento ta dicidi con pa aloca e fondonan.
4. Si nos como pueblo permiti Ministronan pa firma un MOU di e forma aki, nos ta permiti nan viola nos Comptabiliteitsverordening, y alabes disminui e Budgetrecht di Staten.
5. Paso si no ta Staten, nos kier sa ken ta dicidi con nos fondonan publico ta wordo aloca.

RAIZ ta demanda publicamente pa wak e richtlijnen y beleid pa ora ta trata e tipo di acuerdonan aki. Pa pueblo ta preocupante pa wak ora ministernan ta purba bypass e Comptabiliteitsverordening. Alavez e MOU mes tambe ta indica cu e no ta bindend y cu no tin consequencia financiero si cancela esaki.

Pueblo por ta sigur cu RAIZ lo pidi autoridad hudicial pa “follow the money” di Walter te cerca su ultimo beneficiario. Nos ta RAIZ, nos ta wak pa solucion y e futuro yen di posibilidad sin corupcion.  Nos no ta laga ningun politico contamina nos cu nan virus autodestructivo.