Diamars anochi, 1 di juni, plataforma RAIZ a inicia su “Bienta Tera” tour den e centronan di bario rond Aruba, cuminsando na Savaneta. E evento aki, cu tabata bon bishita diamars anochi, a wordo introduci na 2017 caba como parti di RAIZ su forma diferente pa conduci campaña electoral.
Banda di e Cultivando Tour riba bicicleta partiendo simia den bario, RAIZ semper a percura pa bishita y informa e comunidad di Aruba na un manera respetuoso, unificador, sin causa molester na nos ciudadanonan ni na nos medio ambiente.
Bienta Tera ta un evento “hybrid”, caminda e publico por asisti fisicamente y tambe sigui e presentacion online. Faltando menos cu 1 luna prome cu eleccion, pueblo ta ricibi e oportunidad pa trece nan preocupacion y preguntanan dilanti dirigi na e candidatonan cu ta representa e diferente areanan importante aki.
E aspectonan cu mas a resalta ta e importancia di enseñansa, cuido social, e desaroyo di nos economia den un pandemia, y sin descarta e proteccion di nos naturalesa y medio ambiente.
E siguiente evento lo ta Diabierna, 4 di Juni, 7’or di anochi na Centro di Bario Lago Heights. Tambe por sintonisa e encuentro online y haci pregunta via RAIZ ARUBA su pagina di Facebook.
“Bienta Tera ta con nos hendenan tabata tira e tera na laira pa e biento bai cu e stof y asina e pipitanan di oro tabata wordo gara den un paña,” RAIZ ta splica.
“Participacion activo di nos comunidad ta oro pa nos tur. P’esey nos ta invita henter nos isla pa bin combersa, delibera, comparti ideanan cu nos pa hunto nos logra e futuro nobo pa Aruba.”
