Den ingles tin un dicho: “Back to your roots”, esaki kiermen “bay bek na bo raiz”.
Den e añanan cu a pasa semper diversificacion di economia tabata parti di e combersacion di maneho economico di tur e gobiernonan. Crea un pilar economico nobo no ta sosode den un dos tres. Specialmente den caso cu kier sondea actividad y/of productonan nobo. Pero SI nos tin actividadnan di antaño cu nos a neglisha, nos mester cuminsa na colecta y desaroya nan. Prome cu yegada di Lago nos hendenan tabata biba di agricultura, cria di bestia y pesca. Nos a bira lomba pa e sectornan aki y a bay construi nos careranan na Lago.
Mientras nos ta buscando actividad economico nobo nos mester en todo caso cuminsa reorganisa, modernisa y desaroya nos sectornan primario. Si nos logra esaki, nos lo crea cupo di trabao, scapa divisa, percura pa gobierno haya entrada nobo, pero mas importante: nos ta inverti den nos propio hendenan. Aruba lo ta menos vulnerabel y mas resiliente den un crisis manera esun actual.
“Never let a good crisis go to waste”. Nos mester siña nos les for di e crisis cu nos ta pasando aden y tuma medida pa mehora nos circunstancia. Pa nos por ta mas resiliente pa enfrenta cualkier eventualidad den futuro, gobierno mester gara e oportunidad inespera aki pa crea facilidad mas pronto posibel. Pues ta tempo pa bai bek na nos raiz.
Pa e reorganisacion, modernisacion y desaroyo di e tres sectornan di agricultura, cria di bestia y pesca, RAIZ ta bay asumi e posicion di facilitador den gobierno cu seriedad.
Mester facilita:
- financiamento special pa e sectornan menciona cu condicionnan faborabel,
- tereno special pa e sectornan aki,
- awa y coriente na un prijs acceptabel,
- benta bon organisa di e produccion,
- un instituto cu ta verifica y garantisa e calidad di nos productonan.
- un mercado cu ta habri semanal unda cu e pueblo por haya berdura, fruta, carni y pisca fresco. Manera waf antes.
RAIZ tin mas ideanan con pa desaroya e sectornan aki. E Perspectivanan di RAIZ a worde traha na un forma realistico, cu estudionan teniendo tur factor cu ta necesario pa desaroya e sectornan aki na cuenta. Reduci e dependencia di nos isla ta un responsabilidad di nos gobernantenan, y RAIZ kier mira mas wordo haci.
Drs. Ling Wong pa Plataforma RAIZ
