“Cu muchanan y hobennan bon educa, henter un pais lo beneficia”
Como mayor semper nos kier e mihor pa nos yiunan. Un di e preguntanan cu mi ta haya di hopi mayor ta: “tin algun actividad educativo of recreativo cu mi yui por participa na dje?”
Situacion actual:
Hopi ta e muchanan y hobennan cu despues di scol practicamente no tin nada di haci. Hopi ta ferfela nan mes na cas, otro ta sali foi cas bay buska coi hasi pa asina nan tene nan mes ocupa cu p.e. core bais of bay hunga serca otro amigo, amiga. Pa e mayor esaki tambe ta un situacion basta fastioso, pasobra cada bes bo pensamento ta riba e yiu na cas. Kico mi yiu ta haciendo aworaki? Na unda mi yui ta? E ta haciendo su les? E ta riba caya?
Actualmente no ta tur mucha ta miembro di un club deportivo na unda cu nan ta practica un deporte. Tin un grupo relativamente chikito ta bezig ta sigui les di musica priva of di arte.
Mayornan cu ta traha te laat, cu no ta resta tempo pa hiba nan yiu eherce un deporte of cualkier otro actividad pa relaha nan mes.
Cuponan ta hopi limita pa sigui lesnan di musica y arte pa via di scarsedad di docente.
Un gran parti di nos mayornan no tin e medionan financiero pa laga nan yiu sigui un of mas les. Un mayor facilmente lo escoge pa pone cuminda riba mesa en bes di paga un les di musica of arte pa su yiu.
Ta tempo pa gobierno di Aruba garantisa na nos muchanan programanan educativo y recreativo despues di
orario di scol. Nos muchanan, nos hobennan, mayornan, nos comunidad completo lo benificia di e decision aki.
Unabes den gobierno, plataforma RAIZ lo structuralmente pone e plannan aki bira realidad.
Con nos ta logra esaki?
RAIZ ta consciente di e situacion financiero di pais Aruba. Gastonan extra na e momentonan aki no ta posibel. E opcion mas realistico ta pa haci uzo di expertonan cu nos tin “in house” pa por realisa e plannan aki. Den diferente departamento di gobierno nos tin personanan cu amplio conocemento di Musica , Arte y Movecion. Alabes nos tin Departamento di Cultura y IBISA cu sigur lo duna nan aporte na e plan nan aki, ya cu nos ta comparti e mesun interes: bienestar di nos muchanan y hobennan.
Kico mas bunita pa nos aki na Aruba cu nos mucha y hobennan por domina un instrumento musical.
Kico mas bunita pa nos aki na Aruba cu nos mucha y hobennan por lanta cu amor pa Arte. Arte ta stimula nan
creatividad. Cu creatividad nan por contribui na e cultura di nos pais.
Kico mas bunita pa nos aki na Aruba cu nos mucha y hobennan por ta den movecion. Deporte ta stimula un bon
estado di salud fisico y mental.
Cu bo sosten partido RAIZ lo sa di ehecuta e plannan aki pa cuminsa soluciona e problemanan cu nos pais ta
enfrentando, for di e raiz.
Ivan Croes pa Plataforma RAIZ
