E tempo cu politica tabata encera e strategia pa cumpra voto, pa ofende y insulta co-ciudadanonan, pa enrikece gobernantenan a costo di e pueblo cu nan mester sirbi, ta desintegrando. Politiconan cu ta carga e custumber di difama y calumnia contra nan contrincantenan pa nan propio berdadnan no wordo descubri, ta un rasa den extincion, parti di un era di politica cu ta muriendo.
Danki na e facilidad di Internet, nos mundo a bira chikito. Ya nos no ta depende exclusivamente di e medionan di comunicacion tradicional cu ta controla e fluho di informacion cu nos ta ricibi. Awendia, si nos kier haya sa e berdad, nos tin mas fuente cu nos por acudi na dje.
Importante pa nos comunidad – cu ta transcendiendo danki na generacionnan, visionnan, ideanan nobo – ta pa siña basa nos opinion y decisionnan riba echo, prueba, fuentenan confiabel. Elemina e mentalidad populista, no ta imposibel, pero e ta rekeri un responsabilidad colectivo, un exigencia cu henter e pueblo di Aruba mester para su tras. Transparencia y integridad. Dos palabra cu hopi partido a campaña cu ne den 2017 pa gana voto. E pregunta cu ta surgi: cua partido o movimento lo berdaderamente pone den practica locual cu nan a priminti?
E contesta ta facil: esun cu no tin nada di sconde.
Awor ta con nos por prueba esaki? Cu transparencia y integridad real.
Kico esaki kiermen?
Cu ta ora pa e comunidad di Aruba exigi acceso na documentonan pa por evalua, forma opinion, tuma decision a base di echo y prueba, pa asina nunca mas keda asumi, specula y acusa sin pia pa para riba dje. Nos miho arma contra corupcion ta union pa asina conhuntamente nos exigi transparencia y integridad.
Movimento RAIZ, preparando pa nos prome protesta mayan diadomingo 30 di september, ta wordo confronta cu un ola di strategia bieu e dianan aki. Politiconan cu diripiente no ta considera nos chikito y insignificante mas — mas bien un menasa cu nan no a completamente premira? Nos ta compronde hopi bon con e sistema aki a funciona pa decadanan largo. Awor lo spera di nos banda pa ataca bek? Manera semper a sosode? Busca papel y prueba pa contradici nan acusacionnan? Yama medionan di comunicacion pa un rueda di prensa urgente? Pa zuai cu e papel? Cuminsa contesta deseperadamente tur e hendenan indoctrina cu kier ciegamente defende nan color politico, toch? Nos Por, Sin Miedo, Union Ta Haci Nos Fuerte… y tur esey.
Pero nos ta kies pa uni forsa mayan diadomingo, dia 30 di september, na e palo grandi entre Riu Palace y Divi Phoenix, pa un protesta pacifico cu lo cuminsa 5:30pm unda henter e pueblo di Aruba ta bon bini, sin importa bo preferencia politico ni unda bo a nace. Si nos kier transparencia y integridad di berdad, nos mester reconecta nos comundad bek y no dividi nos mes pa complace esnan cu kier causa disrupcion y caos pa nan por sigui nan maneho anticua, autoritario y auto-destructivo.
