Movimento politico RAIZ ta desea di extende un invitacion na pueblo di Aruba y tambe na tur medio di prensa local, pa ta presente diadomingo awor, dia 30 di September, pa 5:30 p.m. na Palm Beach (bou di e palo grandi entre Riu Palace y Divi Phoenix). Pueblo en general ta bon bini pa particpa na un marcha pasivo pa asina cuminsa colecta firma pa e Peticion di Moratorium.
Manera ya ta conoci pa tur esnan cu a sigui e pasonan di e movimento aki durante y despues di ultimo eleccion, RAIZ ta para firme pa introduccion di un moratorium riba hotel, timeshare y condominium nobo. Ta tempo pa nos como pueblo uni forsa y exigi nos gobernantenan pa tuma nos opinionnan na serio. Pa nan Stop di compromete nos isla na proyectonan hotelero y turistico cu tin efectonan negativo riba nos bienestar social y economico.
Diadomingo awor, dia 30 di September, na Palm Beach, den sombra di un di nos palonan mas stima na Aruba, nos ta warda un y tur cu ta comparti e mesun preocupacionnan aki, pa bin manifesta hunto como un pueblo uni, un bos fuerte cu ta keda bisa: “NO MAS”. Di e forma aki RAIZ ta cuminsa lidera un peticion tan anhela y necesario pa asina sostene y finalmente transmiti e introduccion di un moratorium riba hotel, timeshare y condominium nobo.
Aruba su presencia lo ta altamente aprecia.
