Kico ta un peticion di LOB?
E Landsverordening Openbaarheid van Bestuur (LOB) a drenta na vigor na 1999 y ta obliga e gobierno di Aruba pa facilita informacion encuanto nan maneho, den caso cu un ciudadano ta rekeri esaki. Por medio di un peticion di LOB un ciudadano por pidi disposicion (inspeccion) di documentonan manera: permisonan; conseho referente na un desicion; un cambio di destinacion di erfpacht; rapportnan publico implementa na beneficio di e gobierno. Den e “Landsverordening openbaarheid van bestuur” capitulo 3 Art.7 ta indica exactamente cua consehonan mester wordo haci publico.
Download full e ley di LOB: 0206AB99.012.pdf
Kico ta e ROP?
Ruimtelijk Ontwikkelingsplan Aruba (ROP) ta un plan di maneho integral di gobierno cu ta indica e desaroyonan mas desea pa loke ta trata e teritorionan di Aruba.
Esaki a wordo determina den Landsbesluit di 7 di mei di 2009, number 7.
Download full documento di ROP: ROP Atlas.pdf
Download ROP planbeschrijving: ROP planbeschrijving.pdf
Entrega di peticion di LOB
Dia 7 di mei di 2018 RAIZ a entrega na tres minister un peticion di LOB encuanto un declaracion reciente di e Minister di Turismo, Salud Publico y Deporte cu kier trece un cambio cu e ta considera cardinal pa asina realisa e proyecto di “Isla di Oro” na Pos Chiquito. Segun e ROP e area aki ta wordo describi como “zona di mangelnan situa den un reserva natural marino rondona di centronan di residencia”.
E peticion di LOB a wordo entrega na:
Minister di Turismo, Salud Publico y Deporte – Sr. D.P. Oduber
Minister di Finansas, Asunto Economico y Cultura – Sra. Mr. X.J. Ruiz-Maduro
Minister di Desaroyo Teritorial, Infrastructura y Medio Ambiente – Sr. O.E. Oduber
Segun e “Landsverordening openbaarheid van bestuur” capitulo 2 Art.3 e minister tin tres siman di tempo pa procesa e peticion. Den caso cu esaki no ta posibel, e minister por prolonga e fecha di entrega un solo biaha cu un termino maximo di tres siman. E minister mester precura pa informa e peticionario na tempo, por escrito y indicando e motibonan.
Situacion actual:
E prome tres simannan lo caduca dia 28 di mei di 2018 y te dia di awe RAIZ solamente a ricibi reaccion di Minister di Desaroyo Teritorial, Infrastructura y Medio Ambiente – Dhr. O.E. Oduber.
E unico documentonan cu a wordo transferi ta e documentonan cu e minister tabata tin den su posesion cu a wordo entrega pa e desaroyador di e proyecto.
Verbalmente e minster en cuestion a aclarea cu e no tin ningun otro documento den su poder.
DNM (Directie Natuur en Milieu) a duna di conoce cu sigur un conseho a wordo emiti pa loke ta trata e proyecto di “Isla di Oro”.
Cu gran decepcion nos di RAIZ conhuntamente cu pueblo di Aruba mester constata cu Minister di Turismo, Salud Publico y Deporte – Sr. D.P. Oduber y Minister di Finansas, Asunto Economico y Cultura – Sra. Mr. X.J. Ruiz-Maduro, no a reacciona riba nos peticion di LOB.
Comments
One response to “Kico ta un peticion di LOB?”
Bon nochi. Ora cu haci uzo di un ley manera esun di LOB no solamente e ley mes mester wordo lesa pero tambe e “Memorie van Toelichting” (MOT). Esaki ta un documento unda e “wetgevende macht” ta splica loke e kier meen cu cada articulo di un ley. Den lengua professional di un ambtenaar manera ami tabata, e ley ta “letter van de wet” y e “Memorie van Toelichting” ta e “geest van de wet”. Un juez lo tene cuenta cu tur dos den un caso dilanti corte.
Si uno lesa e MOT anto lo lesa cu tin excepcion den e obligacion tocante cua informacion mag y cua no mag di wordo publica.
Articulo 8, 9 y 10 di e LOB ta prescribi cua informacion no mag di wordo divulga y den e MOT esakinan ta wordo splica mas miho pakiko no.
Den Bon Dia di 5 di juni 2018 pagina A32 mi por a lesa cu RAIZ ta decepciona cu algun ministro no a reacciona ariba e peticion di RAIZ a base di LOB. Si mi lesa articulo 3 punto 2 di LOB bon anto ta para claramente cu e ministronan concerni mester a tuma un decision dentro di 3 siman despues cu a ricibi e peticion a la menos cu segun e punto 3 di e mesun articulo e ministro concerni a laga RAIZ sa cu nan no por haci esey dentro di 3 siman.
Esey kier meen anto cu si un ministro no tuma un decision den un periodo specifica anto esaki ta wordo considera como un rechazo (“afwijzende beschikking”). Segun ami un rechazo tambe ta un decision pero fictivo y esey kier meen cu RAIZ por cana e caminda manera ta prescribi den un otro ley cu ta yama “Landsverordening administratieve rechtspraak” of LAR. Pa medio di LAR RAIZ por obliga e ministronan concerni pa tuma un decision tocante otorgamento di e informacion.
Hopi exito y saludo,
Leopoldo Henriquez