RAIZ: Simposio di Derecho di Naturalesa ta exclusivamente pa informa
Manera movimento RAIZ a anuncia pa varios siman caba, diasabra awor dia 9 di juni, e tan spera simposio “Derecho Di Naturalesa” ta bay tuma lugar di 7 pa 10pm den aula di Universidad di Aruba. E simposio aki ta completamente gratuito. Di e forma aki RAIZ kier contribui y keda trece e topico di naturalesa ariba agenda pa asina informa y educa e pueblo di Aruba ariba e posibilidadnan cu ta existi pa cu proteccion di nos medio ambiente. Alabes RAIZ kier brinda henter nos comunidad oportunidadnan unico pa siña di “best practices” den e region.
Un di e invitadonan di e anochi ta señora Natalia Greene, ambientalista y representante di Global Alliance di Rights of Nature. Señora Greene ta procedente di Ecuador, unda el a logra como ciudadano hoben y profesional, pa introduci Rights of Nature den e constitucion di su pais. Di e forma aki Ecuador ta salvaguardiando su medio ambiente pa e futuro generacionnan, por medio di e derechonan di naturalesa.
Tambe lo fungi como orador sr. Giancarlo Nunes kende ta un biologo marino local. Sr. Nunes lo elabora ariba e funcion di e bida marino cu ta rondona nos isla, e conservacion di e zona aki como tambe e otro areanan di naturalesa destina pa forma parti di e parke nacional cu mester wordo protegi.
Publico presente por conta tambe cu e contribucion di Sra. Micheline Bury, docente di facultad di ley na Universidad di Aruba. Sra. Bury a skirbi un tesis cu hustamente ta trata e introduccion di Derecho di Naturalesa na Aruba. Di un forma hopi accesibel y practico, Sra. Bury lo splica e motibo di su escogencia pa locual ta trata e tema di su tesis, e resultadonan di su estudio y e consecuencianan positivo cu esaki lo tin pa Aruba.
Na final di e prome parti di presentacion lo tin un foro cu lo consisti di un combinacion di diferente NGO’s cu lo debati ariba varios topico relevante pa cu cuido di nos naturalesa y medio ambiente. Lo bay tin oportunidad pa dirigi pregunta na e oradornan cu lo por hiba e discurso na un analisis mas profundo di e diferente topiconan di nan experticio.
Intencion di e simposio di Derecho di Naturalesa ta exclusivamente pa informa, conscientisa y stimula participacion activo di nos comunidad pa asina logra alcansa e Aruba sostenibel cu nos tur ta desea pa nos mes, nos yiunan y futuro generacionnan
