CUESTIONARIO RAIZ ENCUANTO PROYECTO ISLA DI ORO
ORANJESTAD – Dialuna dia 7 di mei, den cuadro di TRANSPARENCIA, e partido RAIZ a entrega un peticion na Gobierno pa informa y persuadi nos gobernantenan y publico en general pa reevalua e intencionnan berdadero tras di e desaroya cualkier proyecto comercial den areanan di naturalesa protegi, entre otro e construccion di un resort mey mey di e mangrovenan na Pos Chiquito.
Mirando cu den statuto di nos movimento ta stipula claramente cu como meta e bienestar general di e pueblo ta primordial, e politica moderno cu RAIZ ta conduci lo sigui pone e ser humano central. RAIZ ta promove y reconoce no solamente e “derechonan di naturalesa” sino e derechonan di nos ciudadanonan ora ta trata di e mihor calidad di bida cu nos tur ta papia di dje y ta desea di alcansa y mantene. E dos metanan aki ta bay man den man. Sin no tin vision pa locual ta trata e maneho y progreso di nos isla a largo plaso, nos ta manehando nos pais pa sobrebibi un dia mas, y no pa e generacionnan nos dilanti.
Segun e Landsverordening openbaarheid van bestuur (LOB), cualkier ciudadano por haci un peticion por escrito pa rekeri informacion y pa pueblo tin acceso na documento. Segun artikel 1, lid 1, LOB, e minister di cual dicho proyecto ta cay bou di su maneho, mester coopera ora di wordo pidi pa informacion.
Pa facilita e discusion publico, RAIZ a pidi – conforme ley (LOB) – diferente documento. Sigur lo kier mira copia di ‘social-economic impact assessment’ y ‘environmental impact assessment’.
Un tema di gran preocupashon ta cu no tin claridad riba kico lo bira e forma con e ministernan den e Gabinete nobo lo anda cu proyectonan /raportnan manera ROP.
PREGUNTANAN ADICIONAL NA MINSTER :
- Minister ta considera e manglonan na Isla di Oro un area delicado di nos eco-sistema nacional?
- Minister ta di opinion cu Gobierno tin un obligashon pa proteha e areanan LIMITA di eco-sistemacu a resta na Aruba ?
- CONCRETO : Ta existi afspraak entre Ministernan tocante e forma con e Gabinete aki lo anda cu implementacion di cambionan na proyectonan/raportnan manera ROP?
- Te existi entre Ministernan un acuerdo den cual ta defini y crea e beleid pa loke ta e condicionnan den cual por haci cambio riba tereno di maneho.
- Den caso di ROP, esaki ta un tema cu a wordo studia ampliamente – scientificamente y door di profesionalnan – pero sin un beleid publica, esaki ta laga cada Minister liber pa haci cambio segun ta haña ta bon.
- Minister lo percura pa publica un beleid riba e tema di hacimento di cambio pa asina evita cu proyectonan manera ROP por wordo cambia sin mas, sin sigui ningun checks and balances prescribi di antemano?
- Ta riba agenda di Minister of Ministerraad pa produci beleid y maneho pa defini e condicionnan bou di cual por haci cambio na p.e. locual tin stipula den ROP?
- A pidi advies di tur esnan cu a produci e ROP pa discuti cambionan cu eventualmente lo wordo haci na esaki? E contenido ta disponibel pa Prensa?
- Lo cumpli cu e peticion di RAIZ den e tempo defini pa ley?
