Si Rioolwaterzuiveringsinstalatie (RWZI) Bubali no wordo renoba segun e recomendacionnan di TNO, Oranjestad y e area di hotel lo termina como un “beerput den aire liber”.
Tur awa di pos y riolering mester wordo procesa prome cu deshaci di esaki of re-uza esaki den un forma cu no ta afecta salud di nos habitantenan ni di nos naturalesa. Gran parti di e awa procesa ta termina den Bubali plas, cu awor akinan ta un di e atraccionnan turistico mas grandi di Aruba. E otro parti di e awa ta wordo uza pa muha mata, mas tanto na e dos canchanan di Golf cu tin den e area turistico. Ora Bubali Plas y e Saliñanan yena ful (por ehempel durante temporada di awacero), e awa ta yega te den lama.
RWZI Bubali ta e planta mas grandi cu Aruba tin pa procesa e awa aki cu ta procedente di casnan domestico, scolnan, bañonan publico, restaurant, hotel etc.
E planta na Bubali ta den operacion desde 1972 y cu e crecemento rapido di nos populacion y e area turistico, e awa di pos/riolering cu mester wordo procesa a surpasa e capacidad maximo cu e planta aki por maneha.
A consecuencia di esaki e calidad di e awa procesa no ta optimal mas, afectando entre otro e bida acuatico den Bubali Plas. Ora e awa aki yega den lama esaki ta afecta e bida acuatico eynan tambe, incluyendo e coral.
E problema mas serio ta cu tin daño na e tanki di concreet cual ta hopi peligroso, ya cu si e muraya di concreet kibra tur e “awa sushi” lo drenta Bubali Plas y e Saliñanan sin cu el a wordo procesa. Alabes e riolering di Oranjestad y e area di hotel lo pega te bay over ya cu e awa lo no tin niun caminda pa bay.
TNO a traha un raport encuanto e problema cu tin na RWZI Bubali den cual nan a trece e solucion incluyendo e gastonan envolvi den esaki. A indica cu e solucionnan mester wordo implementa pa 2020.
Ta hopi preocupante cu na e momentonan aki ta pleister ta wordo poni unda cu un operacion mester tuma lugar.
Si RWZI Bubali no wordo renoba segun e recomendacionnan di TNO, den un futuro cercano Bubali Plas, e Saliñanan, Oranjestad y e area di hotel lo definitvamente termina como “beerput den aire liber” – un desaster cu ainda nos por evita.
Nos ta pidi Parlamento di Aruba pa trata e tema importante aki lo mas pronto posibel.
Pone interesnan partidista un banda y pone e interes di Aruba su economia y medio ambiente na prome luga. Si e desaster aki socode, e consecuencianan lo wordo sinti den cada hogar riba e pida baranca aki.
Click riba e siguiente link pa e report di TNO:
https://raizaruba.com/wp-content/uploads/2019/07/TNO_2018_R10138_Preliminary-Business-Case-for-RWZI-Bubali_Final.pdf
