Categories
Bon Gobernacion Social

Tur Partido ta papia di castigo minimo sin considera e problema riba su mes

Castigo ta keda importante, sea ta castigo maximo of castigo minimo. Na final di dia, e agresor tin cu paga pa su crimen, cu den e caso aki ta trata di e abuso sexual di un mucha.

Pero dicon no ta papia tocante e tema di prevencion? Un punto sumamente importante pa por evita mas caso di abuso sexual di nos menornan? Pakico no ta papia di nos sistema (protocol) cu mester funciona optimalmente pa preveni prome cu yega na determina e tipo di castigo? Esaki ta demostra cu no tin boluntad ni vision politico di ningun partido, solamente promesa bashi ora ta papia di introduci mas castigo of castigo minimo sin tuma na cuenta e importancia di prevencion y e sistema (protocol).

Castigo minimo por ta peligroso si bo sistema no ta funciona manera mester ta, p.e. door di falta di Polis/Recherche (KZP), falta di material, falta di un vertrouwensarts y falta di comunicacion y cooperacion entre e departamento of instancianan cu ta envolvi directamente den e casonan aki.

Mayoria caso ta bin dilanti despues cu e abuso a tuma lugar. Esaki ya caba ta un desbentaha den corte, di cual e resultado ta, cu si no tin prueba e agresor lo wordo laga den libertad, si e Hues tin cu duna castigo a base di minimumstraf.

Pa yega na investigacion mester haci un denuncia, pa yega na corte mester tin prueba y un investigacion optimal. Pa yega na prueba bo mester tin un bon investigacion medico. E pregunta ta, Aruba tin esaki na su lugar? E respuesta ta simpel, NO! Si bo no tin esaki nan na lugar, e caso no lo yega corte, corda pa e yega na un castigo. Departamentonan cu ta directamente envolvi cu abuso sexual di mucha, mester traha hunto pa ta mas diligente, pero tambe pa nos por tin un cifra real di e problematica aki. Na final di dia mester traha hunto pa e bienestar di e mucha y su famia.

No por ta posibel cu na momento cu bo haña sa cu bo yiu a wordo abusa, bo tin un caminda di cruz pa cana pa haña ayudo y busca husticia. Aruba mester tin un solo departamento manera Child Protective Service na Merca, asina cu bo yega, bo ta wordo atendi inmediatamente, na e bienestar di e mucha. Investigacion, verhoor, medisch onderzoek y ayudo psicologico ta wordo haci na e momento ey. Aki na Aruba mester warda por lo menos 2 siman pa un cita cu specialista (Pediatra/Gynaecoloog) mientrastanto cu e famia ta den un dolor no ta haña e sosten debido.

One reply on “Tur Partido ta papia di castigo minimo sin considera e problema riba su mes”

Zet de RAIZ teksten ook in het Engels of in het Nederlands — er zijn heel wat mensen die twijfelen en de voorkeur geven aan een nieuwe partij —- ikzelf “share” geen teksten in Papiamento.

Comments are closed.

%d bloggers like this: