Si mester paga boet/claim, ta con ta haci esey?

Esaki ta un pregunta cu movimento RAIZ ta considera como “false choice” – un alternativa falso. Pasobra e opcion No ta entre “paga boet” of “paga nada”. E preferencia ta realmente entre “paga boet”, of “paga boet den forma di gastonan riba futuro presupuestonan”. Si e desaroyonan descontrola di construccion di hotel, timeshare y condominio no wordo para, e ora ta paga nos tur lo mester paga pa esaki. Con?

Sea nos ta paga awor of nos lo termina ta paga pa expansion desproporcional di nos infrastrucura, mas presion social ainda, presion riba AZV/SVB, riba enseñansa, ect. Criminalidad ta subi, congestion den trafico ta aumenta, nos producto turistico ta deteriora… Saturacion a cuminsa mata e galiña cu ta pone webo di oro pa nos tur por biba felis.

Prome cu papia di paga un claim, RAIZ ta conseha pa e siguiente pasonan ser tuma:

1. Averigua prome si acaso tin un boet
2. Sa kico e montante di e boet aki ta
3. Compara e montante cu e gastonan cu gobierno lo kier cobra pueblo pa sostene expansion explosivo di nos populacion, y e consecuencianan negativo cu esaki lo trece pa Aruba

 
Si acaso mester paga boet pa kibra contract, nos como pueblo mester corda bon cu CFT y Hulanda ta exigi un presupuesto a largo plaso. Kiermen cu mester cuminsa inclui den e presupuesto e impacto financiero negativo cu e proyectonan aki ta ocasiona. E impacto riba e presupuesto di gobierno cu e.o. e introduccion di 17,000 hende extra lo causa.

Locual tambe ta di suma importancia ora ta trata e proyecto specifico aki ta, pa documentonan di 2006 wordo haci publico. Asina pueblo mes por conclui si di berdad a cumpli cu tur e condicionnan di erftpacht manera ley ta prescribi. Paso si en berdad e compania no a cumpli cu e 6 lunanan difini pa cuminsa construcion, awor nos no mester ta papiando mes di boet ni claim.

Mientrastanto, nos como pueblo mester keda scerpi y critico, cuestionando cada decision cu por tin un impacto negativo riba nos bienestar social y general. Tanten nos por scapa nos mes di e desgracia irevocabel aki, nunca ta laat. Awor mester actua.