Un di e palabranan clave cu a resona durante elecion 2017 tabata: INVESTIGACION. Pa RAIZ ta importante pa pueblo tin claridad riba loke nos ta referi na dje como Acusacionnan Serio. Nos por a tuma nota cu tin tres minister cu hunto tabata responsabel pa e Ministerio di Infrastructura y Planificacion durante e ultimo 17 añanan, cu ta ACTIVAMENTE y PUBLICAMENTE yamando otro pa corupto.
Banda di e situacion bergonsoso aki, nos como ciudadano mester guli manda abou numa, ya cu ningun paso ta wordo tuma pa resolve e asunto. Pueblo no ta mira ningun tipo di accion di parlamento pa trece claridad riba e acusacionnan aki. Con ta sigui awor?
Concreto ta lo siguiente:
- Pueblo no sa exactamente kico a pasa den pasado cu otorgamento di tereno
- Pueblo no sa exactamente kico ta pasando awor
- Pueblo no sa exactamente kico ta bay sosode pa evita ripiticion di tur loke a pasa den pasado
Movimento RAIZ no ta huzgando ni Marisol ni Benny ni tampoco Otmar, ya cu no tin un caso andando unda pruebanan a of ta wordo evalua. Loke nos ta huzgando ta henter e sistema cu a bay robes. Nos kier sa na unda e proceso a tranca y kico ta e pasonan concreto rekeri pa para tipo di actonan asina di sigui tuma lugar.
Pa nos e suceso aki ta otro muestra di con integridad ta desintrega nos dilanti. Pa reestablece Integridad y Credibilidad, RAIZ ta conseha nos Prome Minister Sra. Evelyna Wever Croes pa laga conduci un investigacion forensico mas pronto posibel.
Un investigacion forensico por wordo conduci door di un entidad independiente di gobierno manera Transparency International. Gobierno di Aruba, atraves di Hulanda, por busca asistencia di GRECO (Group of States against Corruption) pa e tipo di investigacionnan aki.
Si Aruba no haci algo, RAIZ lo mester acudi cerca CFT pa e mensahe yega Binnenlandse Zaken en Koninkrijksrelaties (BZK) y Rijksministerraad cu Aruba kier asistencia di GRECO. Aunke awor nos ta enfocando riba combatimento di corupcion actual riba nos isla, esaki no kiermen cu e pasado por wordo hala un banda sin mas.
