RAIZ: Un golpi fuerte na e cultura politico di “fix” cos
Nos a sigui e segundo tanda di e reunion cu a cuminsa 31 di juli 2020 cu hopi atencion. Loke Minister Lopez-Tromp a wordo forsa di hasi pa motibo di un posibel mocion di desconfiansa, esta di para den parlamento y presenta e situacion di corrupcion den su ministerio, ta algo cu RAiZ lo exihi di tur minister di e proximo gabinete. No ta bai warda riba un mocion di desconfiansa pa pone e ministernan basha’bow.
Na 2017 RAiZ a indica cu Aruba mester un Minister di Integridad. E motibo pa esaki ta cu corrupcion ta tuma lugar na nivel di minister bai abow, pues no por atende cu integridad solamente na nivel di ambtenaren. No por spera di un hoofd van dienst pa e ta un whistleblower si riba su cabez e tin un hefe (minister) cu por ta corrupto. Ta comprendible cu ningun hende lo risca saca nan cabez pa despues nan perde nan trabow.
Y ayera por a nota cu e miedo aki ta real. Por a nota e forma con miembronan di parlamento a trata minister Lopez-Tromp. Envez di aprecio pa un minister cu ta alerta publico pa casonan di corrupcion y falta di integridad, e minister a wordo interoga y bagatalisa. Enbez di a puntra e minister kiko parlamento por hasi pa yud’e den su esfuerzo pa combati corrupcion den su ministerio, parlamentarionan a exihi di e minister pa e entrega na parlamento (!) pruebanan cual tur hende sa cu e minister no por comparti libremente. Na mes momento ta parce cu ningun parlamentario a wordo sorprendi tampoco pa e cantidad di casonan cu e minister a presenta.
Ban pensa bon ta kico a pasa ayera nochi, esta cu un minister di Aruba den pleno parlamento y den bista publico a conta con ela hereda un ministerio infecta pa corrupcion. E prome reaccion di parlamento ta cu e problema di corrupcion ta un problema di ‘percepcion’. Ta con por spera di ambtenaarnan pa nan bin dilanti ora cu un minister mes ta wordo trata di e forma aki ora e denuncia corrupcion?
Den futuro tur minister lo wordo yama dos biaha pa aña pa bin Parlamento y duna un relato publico di e ‘state of affairs’ pa loke ta trata integridad y combatimento di corrupcion den nan ministerio. No por ta asina cu ministernan ta acumula casonan di corrupcion y ta colecta evidencia, pero ta warda esakinan den lachi pa uza ora segun cu ta cumbini nan of no. Door di exigi ministernan duna cuenta na publico, e pueblo ta haña e oportunidad pa mira kico ta pasando. Pa RAiZ esaki ta parti integral di cualkier acuerdo di coalicion. Sea e minister mes ta duna cuenta na parlamento of e Minister di Integridad ta haci esaki a base di trabow e.o. di Bureau Integriteit Aruba y Ombudsman pa asina e dos instancianan aki no bira tiger sin diente, cu ta traha raport pa yena lachi.
Ta berguensa pa scucha den parlamento di Aruba un lista di cosnan cu a “fix” y a purba “fix” den un solo ministerio. Ta penoso con e parlamentarionan a mustra di no ta interesa pa laga e minister papia libremente y a logra rek e tempo di forma cu e minister a bin na palabra despues di 12’or di anochi, ora cu pueblo ya a bai drumi. Na final a sera e anochi cu un gesto simbolico, un mocion pa e minister entrega keho na ministerio publico. E desconfiansa cu POR a expresa riba nan propio minister a bolter y a crea mas desconfiansa den nos parlamento.
