Durante ultimo simannan a nota diferente desaroyo pa loke ta trata Aruba su transicion pa energia renobabel, specificamente hidrogeno. Esaki ta un desaroyo cu lo duna forma na Aruba su portfolio di energia den un manera cu lo beneficia generacionnan dilanti nos. Esaki ta un desaroyo cu lo permiti Aruba produci su propio energia limpi.
E proceso pa cuminsa cu hidrogeno ta un parti di e vision y dedicacion di plataforma Raiz pa un pilar economico nobo. A traves di Raiz, nos profesionalnan a duna contenido na e concepto aki. E desaroyo di hidrogeno sigur lo trece cupo di trabou pa nos hendenan, uno cu NO ta pone progreso di Pais Aruba dilanti prosperidad di nos medio ambiente.
Na 2020, e prome simianan a wordo planta pa e raiznan por crece pa loke ta trata trece un planta di hidrogeno na Aruba. Na 2021, Raiz a sigui informa pueblo ariba e beneficionan di energia limpi den forma di hidrogeno hunto cu otronan cu tambe ta kere den e vision. A inclui e punto aki den Raiz su perspectivanan, esta e programa di partido, cual ta mustra nos compromiso pa realisa e vision aki.
Hidrogeno no ta un gas desconoci, pero den e ultimo añanan e la wordo subraya pa su propiedadnan y uzo. Un gas limpi cu por wordo uza den sector di transporte manera barco, avion, auto pero tambe den industria pisa. Asina nos por cuminsa na baha e dependencia riba importacion di azeta crudo (fossil). E reksitonan pa produci hidrogeno limpi ta como lo siguiente, energia renobabel mane solo cu/of biento; awa (salo); un waf pa barco por yega y facilita e transportacion pa otro pais y un tereno industrial.
Manera por lesa, nos Pais tin tur loke ta necesario pa produci hidrogeno limpi y tur e recursonan na nos disposicion pa transiciona pa un economia di energia limpi. Aruba ta provee e circunstancia ideal pa establece un planta pa produci hidrogeno. Pues e noticia cu Gobierno di Aruba a firma un MoU cu e compania Acciona Energia y Utilities Aruba pa un refeneria di hidrogeno, ta pone nos un stap mas cerca di e futuro cu nos ta envisiona. Hidrogeno y energia renobabel en general ta di suma importancia pa Aruba su futuro. E ta yuda reduci nos emission pero tambe ta reenforsa e resilencia di nos economia y haci nos menos dependiente di factornan externo.
Awe nos por bisa cu Aruba actualmente ta liderando den e transicion pa energia renobabel den caribe y ta premira cu pronto e prome bloki lo wordo poni pa un pilar economico nobo y limpi pa Aruba. Di vision pa realisacion.
