Durante tratamento den Parlamento di e ley pa introduci BBO na frontera, mi a expresa di no lo por sostene e introduccion aki sin un toezegging di Gobierno cu cubrimento di gasto di logopedia drenta na vigor no mas tarda cu BBO na frontera. Mi a ricibi critica pa tuma e paso aki, variando di critica indicando cu no por relata un ley di impuesto na cobertura di logopedia, te cu lo ta corupcion pa un parlamentario expresa un posicion asina. Permiti’mi pone mi decision den contexto.
Logopedia ta un forma di terapia cu entre otro ta stimula e desaroyo di habla. Muchanan cu tin un atraso den nan desaroyo di habla ta perde oportunidadnan crucial pa participa den e mundo social ora mas nan mester di dje. Bo desaroyo di habla ta importante pa stimula bo abilidad di pensa, bo desaroyo social y e desaroyo di bo mes como persona. Na Aruba tin hopi mucha cu mester di e tipo di terapia aki pero nan mayornan no por paga p’e. Cobertura ta importante pa percura cu mas mucha por tin acceso na e tipo di terapia aki y asina stimula oportunidad igual.
P’esey dia 9 di November 2021 mi a entrega un mocion urgiendo Gobierno pa regla cobertura di gasto di logopedia via AZV (pakete basico). E mocion a wordo aproba unanimamente. Pa realisa e cobertura, Gobierno mester traha un “Landsbesluit, houdende algemene maatregelen”. Esaki ta un tipo di ley cu Gobierno por traha sin cu mester pasa Parlamento.
Despues cu e mocion a wordo aproba, mi a follow-up pa cobertura di logopedia bira un realidad. Mi a haci esaki entre otro door di manda pregunta na e Minister concerni (Statenvragen) y a concipia un nota pa splica e importancia (Kansengelijkheid voor kinderen die logopedie behoeven) cu eventualmente por wordo usa pa e “nota van toelichting” di e ley.
𝐏𝐫𝐢𝐨𝐫𝐢𝐝𝐚𝐝
Mientrastanto 20 luna a pasa desde cu e mocion a wordo aproba. Hopi otro ley a wordo concipia y publica durante e tempo aki. Incluyendo proyectonan di ley cu un embergadura hopi mas grandi y compleho. Durante e periodo di 20 luna cu e ley pa cobertura di logopedia no a keda cla, mas cu 50 otro ley a wordo publica. E leynan cu ta keda cla, y esunnan cu no ta keda cla, ta bisa algo di e prioridadnan den gobernacion. Ora mi a expresa di no lo sostene BBO na frontera sin un toezegging cu cobertura di logopedia ta drenta na vigor no mas tarda cu BBO na frontera, mi ta señalando e importancia di tene bista riba prioridad, y e urgencia pa esnan cu e necesidad pa tratamento logopedico sin por paga p’e.
𝐖𝐞𝐥𝐯𝐚𝐚𝐫𝐭 𝐞𝐧 𝐖𝐞𝐥𝐳𝐢𝐣𝐧
Algun politico a indica di no por relata un ley pa cobertura di logopedia na un ley pa introduccion di un impuesto. Ami ta wak e diferente. Maneho di gobernacion mester ta un maneho integral y coherente. No por wak un parti di e carteranan di Gobierno los di e otronan. Mester tin “eenheid van beleid” y mester tene cuenta cu con e totalidad di un maneho ta afecta pueblo.
For di prome cu mi a asumi e funcion di Parlamentario, mi a enfatisa e importancia di e coherencia necesario entre welvaart y welzijn. Esaki ta parti di e ideoligia social democrata, cu ta e ideologia di ambos partido den coalicion.
Kico ta e proposito di sigui pasa ley di impuesto, cu ta aumenta entrada pa Gobierno, sin cu parti di e fondonan wordo utilisa pa e desaroyo y bienestar di en particularmente mucha? Welvaart y welzijn mester bay man den man. Mi ta compronde e necesidad di mehora e situacion di finansa publico di Aruba. BBO na frontera no ta algo popular pero ta parti di un desaroyo fiscal cu mester yuda mehora e situacion di nos finansa publico y ta yuda crea un level playing field pa loke ta trata BBO en general. No ta asina cu mi no a analisa y considera e contenido di e ley pa BBO na frontera.
Na mesun momento nos no por perde bista di e necesidad di coherencia den maneho y balanse entre welvaart y welzijn. Pa e motibonan aki, mi a dicidi di condiciona mi sosten pa introduccion di BBO na frontera na un aporte pa desaroyo y bienestar di esnan den necesidad di logopedia.
E #LuchaPeMucha ta continua.
Pa sigui tur informacion di Parlamentario Misha Raymond bishita www.misharaymond.com
