Den cuadro di transparencia!
Oranjestad – RAIZ a tuma nota di e declaracion algun siman pasa cu Minister di Infrasturctura y Medio Ambiente sr. Otmar Oduber a haci durante conferencia di prensa semanal di gobierno, caminda cu el a informa cu e grupo di inversionista responsabel pa e proyecto hotelero grandi na Seroe Colorado, esta Three Rivers Real Estate N.V., a pasa e screening di departamento di seguridad nacional di Aruba (VDA).
RAIZ ta cuestiona e ponencia di minister Otmar Oduber kende ta pretende cu e asunto aki a keda resolvi. VDA no ta e instancia responsabel pa conduci financial screening tampoco due diligence den cuadro di posible tema di laundering. Banco Central di Aruba tampoco ta e instancia responsible pa haci un screening asina pa Gobierno.
Ademas, tur hende por compronde cu Three Rivers Real Estate N.V. ta solamente un representante local di inversionistanan di exterior. No ta e representante ta wordo cuestiona. Ta e inversionista y e origen di su placa mester wordo clarifica.
Tin companianan manera Trulioo y Bureau van Dijk cu ta certifica internacionalmente pa background check persona y compania. Nan tin database amplio pa haci e trabow aki. Kizas hasta US State Department por fungi como un di tercer opcion pa gobierno di Aruba.
Remarcable den e caso aki ta na ki momento e ministro a pidi e background check … a haci esaki despues cu ya caba Gobierno a commit su mes, despues cu ya e papelnan ta firma y despues cu e placa drenta riba cuenta di gobierno? Responsabilidad pa sa cu kende bo ta sinta na mesa, no ta na momento cu alarma ta bai. Mester haci due diligence prome cu firma document cu e persona. Den caso aki a “faya” barbaramente di controla cu kende ministro ta atende.
Tanto VDA y CBA to reside bou otro ministers cu no ta Minister Otmar oduber. CBA ta cay directo bou di Minister di Finansas Sra. Xiomara Ruiz Maduro y VDA ta cay direct bou di nos Minister President Sra. Evelyna Wever Croes.
Considerando cu VeiligheidsDienst Aruba (VDA) no ta permiti pa divulga contenido di e carta concerni y tampoco permiti pa contradeci e ponencianan di minister Otmar Oduber publicamente, RAIZ ta haci petition na minister presidente Sra. Evelyn Wever-Croes, siendo e minister encarga cu VDA, pa publica copia di e carta di VDA a base di cual e inversionistanan concerni ta pasa screening di VDA, y pa splica si e ta comparti e conclucion concerni di minister Otmar Oduber.
Si dicho carta no ta existi, RAIZ ta pidi minister presidente Wever-Croes y minister di finasas, siendo e minister nan responsabel pa ambos instancia cu ministro Oduber a cita como referencia den e caso alarmante aki , pa clarifica e ponencianan di minister Otmar Oduber regardando e screening concerni. Mirando cu ni VDA y tampoco CBA por sali publicamente cu informacion cu awor nan ta dispone di dje.
Alabes RAIZ ta pidi Parlamento di Aruba pa ta atento y haci debido uso di nan derechonan como parlamentario pa controla e integridad di nos gobierno. Exigi cu ministro den caso aki presenta por lo menos un carta di referencia pa e personanan envolvi.