ORADOR INVITA PA SIMPOSIO ‘E RUTA PA TURISMO SOSTENIBEL’
Oranjestad – Diabierna awor dia 14 di juni, e simposio ‘E Ruta pa Turismo Sostenibel’ lo ofrece henter e pueblo di Aruba un oportunidad unico pa profundisa nos mes den e topico di sostenibilidad den turismo. Un di e invitadonan special pa e anochi aki ta sra. Caroll Guiamo cu lo comparti su conocemento y experticio cu e publico presente.
Caroll Guiamo a gradua na 2004 como Bachelor Teacher of Mathematics. Actualmente e ta duna les di matematica na Avondhavo Aruba. Na 2014 Caroll a dicidi di kita for di su trabou full-time y cuminsa su propio negoshi. E ta maneha su tienda di Aromaterapia y Regalo cu ta carga e nomber di Curiosa.
Caroll ta un aromaterapista certifica y ta duna tayer unda e ta encurasha su clientenan pa biba un bida mas saludabel. Durante e tayernan aki, e ta uza extracto natural di mata pa mehora e salud di e curpa, mente y spirito. Esaki ta eleva salud fisico como tambe salud emocional.
Arte semper a hunga un papel importante den bida di Caroll. For di su di 4 aña e tabata practica e arte di baile cubriendo baile clasico te cu folkorico. El a duna presentacion cu Simadanza, the Xanadu Dancers y ta encanta pa forma parti di Aruba su Carnaval. Di chikito caba Caroll tabata stima creacion y despues di tempo el a desaroya un interes pa diseño di interior. Tambe su educacion den musica di piano y cuarta cu el a ricibi di sra. Maybelline Arends-Croes tabata un fuente di inspiracion p’e. Pero mas cu tur, Caroll ta inspira pa e hendenan cu e ta topa. Un di su expresionnan preferi:
“Our Art and our Culture has a big impact on our Island as a whole. It affects how the world sees us.”
E simposio ‘Ruta pa Turismo Sostenibel’ cu lo tuma luga dia 14 di juni 2019 na Cas di Cultura, di 7 p.m. pa 10 p.m., ta bay ta un oportunidad unico pa haya sa mas tocante Turismo Sostenibel na Aruba, pa conecta cu diferente pionero den area y interesadonan den e topico y asina wordo inspira pa yuda aporta na un turismo y un isla sostenibel y responsabel. Entrada lo ta solamente 25 florin.
Pa haya sa mas tocante e simposio aki, por bishita RAIZ su pagina di Facebook, website of tuma contact via info@raizaruba.com of yama 630-3511
