Dialuna merdia movimento RAIZ a sostene un conferencia di prensa na Bubali Wetlands, mihor conoci como Bubali Plas, pa duna un update encuanto e LOB Verzoek cu a keda entrega dialuna 7 di mei 2018.
Bubali Wetlands ta un Important Bird Area (IBA). Mas di 170 especie di parha a wordo registra caba na e area aki, convertiendo e area den “birding area” number uno di Aruba. Bubali Wetlands ta forma parti di e 16 areanan cu a wordo aproba unanimamente den parlamento pa wordo protegi y alabes poni bou maneho di Parke Arikok.
Na 2017 Prinses Beatrix a bishita Bubali Plas y a haci peticion na nos gobernantenan di e tempo ey, pa proteha e wetlandsnan aki y percura pa nan cay bou maneho di Parke Arikok. Sin embargo, nos por tuma nota cu awe ainda tin casonan andando den corte pa asina por garantisa e proteccion di e prestigioso areanan aki.
Dia 7 di mei, 2018 pa 8or di mainta, RAIZ a entrega un LOB Verzoek den cuadro di transparencia pa ricibi tur documento relaciona cu e proyecto di Isla di Oro. Como lider di RAIZ; Sr. Arends ta declara cu ningun minister a cumpli cu e peticion di RAIZ. E USB cu nos a ricibi di Minister Otmar Oduber no ta contene e informacion cu RAIZ a solicita. Mas bien tabata algun archivo cu informacion comercial cu no ta contesta e preguntanan cu e peticion ta rekeri. Cu otro palabra; e USB tabata un “kat in de zak”. Un oportunidad perdi pa un Minister cu kier demostra su maneho transparente.
Nos di RAIZ lo sigui boga pa Bon Gobernacion y ta spera cu nos ministernan tuma e peticionnan aki na serio, cumpliendo cu e leynan di nos pais. RAIZ ta dispuesto pa considera locual a wordo entrega te awor aki como un prome parti, un pakete di informacion general. E detayesnan mes cu falta pa asina por duna un bista real di e situacion, nos ta kere cu cualkier minister concerni y dispuesto pa informa su pueblo debidamente, lo kier comparti.
Fecha di e prome 3 siman, conforme ley, ta vence dialuna awor 28 di mei 2018. RAIZ su compromiso cu pueblo ta pa lucha pa e Aruba cu nos tur kier biba riba dje y cu nos kier pa nos yiunan hereda.
