Minister Geoffrey Wever:
‘DTZ TA GENERA ENTRADA Y TA IMPORTANTE PA PAIS ARUBA’
Minister di Asuntonan Economico, Comunicacion y Desaroyo Sostenibel mr. Geoffrey Wever a sigui cu su reunionnan di conoce e departamentonan cu ta resorta bow di su ministerio y diamars ultimo, Sr. Wever tabata tin e placer di por a combersa cu Sr. Ludwig Jansen, directeur di Directie Telecommunicatie Zaken (“DTZ”), den un combersacion hopi interesante sr. Jansen a splica kiko tur e rol di DTZ ta, y kiko tur nan ta haci.
DTZ cual tin tur cos di haber cu comunicacion, tambe tin su retonan. A splica e necesidad pa reorganisacion di e departamento. Tambe ta mira un un cuadro legal nobo mester wordo introduci, considerando cu e leynan existente no ta necesariamente ful ekipa pa e mundo moderno di comunicacion.
Mester subraya si cu DTZ ta un departamento cu ta genera entrada importante pa pais Aruba. Pa es motibo cu ta haya cu tin cu optimalisa e framework organisatorio y legal pa e departamento yega su potencial completo.
Minister Wever a keda contento di por a sera conoci cu e empleadonan tambe, kende tur ta contribui di nan parti.
Minister Wever a acorda cu lo traha hunto pa mehora e procesonan existente, y cu lo duna oido na e recomendacionnan haci, manera cuadro legal nobo. E meta ta pa por haci e departamento uno hopi mas eficiente, y facilita coleccion di entradanan.
