Minister Geoffrey Wever:
‘CENTRAAL BUREAU VOOR DE STATISTIEK TA CARDINAL PA GOBIERNO POR TUMA DECISIONNAN INFORMA’
Diaranson mainta Minister di Asuntonan Economico, Comunicacion y Desaroyo Sostenibel mr. Geoffrey Wever a reuni cu directora di Centraal Bureau voor de Statistiek (“CBS”), Señora Helder. E departamento aki ta sumamente importante ya cu e departamento aki ta colecta y analisa data cu ta yuda gobierno ora di prepara maneho y ora di tuma decisionnan importante.
“Mi ta contento di por a mira asina hopi experticio den CBS”, Minister Wever a menciona.
CBS no solamente ta colecta data, pero ta analisa e data tambe, y publica e estadistica tambe pa pueblo di Aruba por ta miho informa y tambe Gobierno mes por basa su maneho riba data.
Pa Minister Wever ta hopi interesante pa mira con nos por colecta data miho y mas liher. Esaki ta hopi importante pa realisa cu si nos tin miho data, nos por traha miho beleid (maneho). Si CBS por haya e mecanismo y e tools nan necesario, nan por colecta data na un forma mas eficiente.
“Evidence-based policy making” ta ora gobierno por traha beleid basa riba data, “nos ta reconoce e importancia di esey”, Minister Wever a splica.
Nos lo sigui duna apoyo na e departamento di CBS, y lo sigui pensa manera pa integra tur data di gobierno den un forma mas dinamico. E obhetivo ta pa cada departamento intercambia informacion cu CBS na un forma dinamico y automatisa riba un plataforma integra entre departamentonan di gobierno. Planificacion economico ta depende riba calculacionnan mas amplio, y mas acceso CBS tin na data, mas miho nos por planifica.
