Diadomingo, 30 di september 2018, movimento RAIZ hunto cu e comunidad di Aruba a inicia e protesta pacifico y accion di firma contra construccion descontrola di mas hotel, timeshare y condominio riba nos isla. E iniciativa aki tabata destina pa publico general, sin importa color politico ni unda bo a nace. E proposito di e protesta tabata pa uni e pueblo pa asina hunto trata na proteha masalmente e paar di beachnan publico cu a resta pa nos ciudadanonan disfruta. Na ningun momento e intencion di e iniciativa aki tabata pa provoca ningun politico. Sinembargo, e organisadornan di e protesta mester señala un gran debilidad den nos comunidad. Manera hopi biaha ta e caso, por a tuma nota un bes mas cu asina nos ciudadanonan critica un maneho of trece preocupacionnan bon funda padilanti, coordinadornan y sostenedornan di partido y te asta e propio politiconan cu mester brinda oido na e pueblo, ta ataca e derechonan democratico aki por medio di tacticanan anti-constructivo y populista. En bes di purba compronde locual ta biba den nos comunidad pa asina hunto yega na un solucion cu lo beneficia nos tur, ta bolbe scoge pa desvia e atencion for di e asunto cardinal pa pueblo ni haya holo di locual ta wordo regla y acorda riba propio merito di nos gobernantenan sin cu nan ta considera e posibel efectonan riba nos bienestar general – of ta prefera di ignora e consecuencianan aki.
Afortunadamente, den apenas un siman di tempo ya caba e peticion di pueblo pa stop e construccion di mas hotel, condominium y timeshare nobo por medio di e introduccion di un moratorium, a acumula mas di 6000 firma. Movimento RAIZ den nomber di pueblo di Aruba ta liderando e peticion aki cu ta boga pa:
- Introduci un moratorium inmediato riba hotel, timeshare y condominium nobo;
- Implementa, manera recomenda pa nos institutonan di turismo, un “high value low impact” tourism policy, por medio di un ley;
- Regula, controla y limita e cantidad di actividadnan turistico (deporte acuatico, huurmento di UTV’s, waterparks, restaurants ect.)
E beneficio di ta biba riba un isla chikito ta, cu den su proporcion e ta mas facil pa maneha cu un pais grandi, tanten henter e comunidad ta envolucra y ta participa activamente y constructivamente na e bienestar general.
Danki Aruba pa laga e prome 6,000 bosnan resona! Ora nos ta kere den nos propio capacidad, nos a yega na mita caminda caba. Awor, ban sigui planta union y respet pa un Aruba di Nos Tur.