Sistema Actual Aruba ta un pais cu ta importa mayoria producto for di exterior, pasobra Aruba mes no ta produci casi ningun producto localmente. Un di e productonan mas importa ta gasolin, como cu gran parti (99%) di e medionan di transporte na Aruba ta uza gasolin awendia. E medionan aki, cu ta wordo considera como Vehiculo Tradicional (VT), ta uza gasolin/diesel como combustibel pa genera energia. Pero tin tecnologia nobo, manera e Vehiculo Electrico (VE) cu ta permiti uzo di energia renobabel. VE a trece un posibilidad nobo pa e isla di Aruba.
Resultado: E mercado mundial actual di gasolin no ta uno stabil, cual ta haci Aruba su economia vulnerabel, door cu Aruba mes no tin ningun control riba e situacion aki. Prijs di gasolin no solamente ta influencia transporte, pero tur otro producto importa tambe. Actualmente ta uza e metodo di ‘hedging’ pa controla y stabilisa prijs di fuel, pero e no ta bin sin riesgo.
Vision RAIZ ta encera un cambio riba importacion di gasolin/diesel. Unabes cu Aruba bira menos dependiente di gasolin, lo por crea un economia mas stabil y controla. Lo mester traha un plan sostenibel basa riba termino largo pa baha importacion di gasolin, cual lo tin un resultado positivo no solamente riba economia, pero tambe riba salud y medio ambiente. Raiz ta kere cu un dia nos mes mester por produci nos energia localmente pa medio di diferente sistema renobabel.
Soluciona RAIZ ta pa inverti den infrastructura pa reemplasa VT pa VE. Segun estudio haci, un VE ta 60% mas eficiente cu un VT y na Aruba un VE ta funciona 45% mas mihor cu na Merca. E diferencia di ‘highway’ y ‘city’ ta haci un impacto grandi riba auto VE. Aruba no tin mucho ‘highway’, mas tanto camindanan cortico, unda cu mester brake hopi. Un VE ta absorbe e energia ora di brake, cual no ta posibel den un auto VT. Esaki ta haci cu un VE lo ta mas atractivo pa Aruba, compara cu e paisnan cu tin mas ‘highway’, manera Merca.
Na e momento aki WEB NV su capacidad ta permiti solamente 4000 VE recarga simultaneamente. Pero como cu un VE su prijs ta halto ainda, e no ta mucho atractivo pa e cumprado di auto na Aruba. E prijs di VE ta 10% pa 25% (depende di e modelo) mas caro cu un VT. E motibo di esaki ta cu VE ta consisti di tecnologia moderno. Sinembargo, den menos cu 5 aña prijs di VE lo baha na un nivel di prijs pareu cu di VT. Unabes cu e prijs ta mas atractivo, lo por alcansa e cantidad (4000 VE) cu WEB NV lo por sostene actualmente. Si introduci 4000 VE, nos por reduci 12% di importacion di gasolin cu ta mas o menos 9.000.000 liter di gasolin. Esaki kiermen cu ya caba nos lo por haci un impacto grandi riba nos importacion di gasolin unabes cu e prijs di VE baha.
Cu introduccion di meter inteligente lo por introduci mucho mas VE, cual lo haci un impacto mucho mas grandi riba nos importacion y economia. Esaki ta permiti e mercado local di produccion y distribucion di coriente expande den uno mucho mas grandi. Asina por crea mas circulacion dentro di nos economia local y ta depende menos di influencia internacional.
