Categories
Bon Gobernacion Social

Balor y Norma

“Ancra manera RAIZ den nos hendenan pa fortifica un fundeshi solido pa tur futuro generacion”

Tur pais ta encontra den un parti di nan historia retonan cu nan mester supera. Ora cu e dialogo ta tranca pa motibonan moral ta importante pa evalua e posicion di un pais; su balor y su normanan. Sin esakinan un pais ta perde su identidad y e preservacion di locual cu e ta para p’e como nacion. Mester salvaguardia e balor y normanan a costo di tur cos. RAIZ ta mira e deterioro di nos balor y norma den e forma con nos hubentud ta actua y unda diferente balornan importante ta ser viola. Atraco, hortamento, droga, perdemento di respet pa mayornan y tambe pa e prohimo ta algun di e consecuencianan di e desaroyonan.

Nos ta na e momento adecua pa haci un chekeo interno. RAIZ ta di pensamento cu mester inverti den nos propio hendenan cu eventualmente lo yuda hiba e pais aki padilanti.

Educacion y bon manera ta cuminsa na cas. Na cas bo ta wordo inculca, mayoria biaha door di bo mayornan, cu principio y balornan manera e.o. honestidad, sinceridad, amor propio, respet, consideracion cu bo prohimo, empatia. Esaki ta e prome lesnan y bo prome contacto cu balor y normanan. Hopi biaha esaki ta tuma lugar den un forma disciplinario, mustrando kico si y kico no ta aceptabel. Di e otro banda balor y norma tambe ta wordo inculca na cas como preparacion pa drenta sociedad. E ta yuda forma nos den individuonan bon prepara pa reenforsa nos comunidad.

Pa esnan cu no ta haya e simia aki na cas, RAIZ ta kere cu comunidad mester crea un red di seguridad basa ariba principionan di solidaridad pa yuda carga cu e falta y ausencia aki for di principio. Nos tur ta forma un solo comunidad, un solo Aruba y como tal ta nos deber tambe pa para solidario cu esnan cu no por genera e balor y normanan aki riba nan mes, pa asina garantisa un pueblo cu ta responsabel y integro.

Na scol, den gruponan social (manera scouting) y otro tipo di formacion individual, mester yuda na duna
contenido na e necesidad aki conhuntamente. Di e forma aki nos por duna bek na e comunidad, ciudadanonan capaz y integro. Na unda cu e infrastructura aki no ta existi, RAIZ ta di opinion cu esaki mester wordo crea pa establece programanan di formacion social cu por asisti y guia hobennan cu a lanta cu e falta di un educacion necesario pa yuda nan integra y funciona debidamente den comunidad.

Balor y norma ta di suma importancia pa e bienestar di nos hendenan, nos mester garantisa cu e ta haya e atencion cu e merece.

%d bloggers like this: