RAIZ: Planta Bo Simia Den Tera Fertil
No falta hopi mas, apenas algun dia prome cu eleccion 2021. E team di RAIZ ya ta conoci pa su forma di core campaña cu ta totalmente diferente. For di su inicio na 2017, RAIZ nunca a gasta placa ni na bandera, ni na sticker, na nada cu por causa daño na nos medio ambiente of n’e trankilidad di nos ciudadanonan. Al contrario, por medio di e Cultivando Tour, nos comunidad ta wordo stimula pa planta y pa cera conoci cu e plataforma aki, cu ta coriendo bicicleta den bario partiendo simia y solucionnan. E bunita di e iniciativa aki ta, cu nos hendenan ta sinti nan inspira y ta haci donacion di simia, mata, como tambe nan tempo como boluntario pa yuda trece un cambio berdadero y duradero pa Aruba. “Esaki ta locual cu nos kier logra,” segun sr. Arends, lider di partido RAIZ. “Un comunidad participativo y consciente di nos propio capacidadnan.”
Tambe e encuentronan di Bienta Tera den e centronan di bario ta ofrece e comunidad di Aruba un oportunidad pa intercambia idea y conoce e team y e perspectivanan di RAIZ. Bienta Tera ta con nos hendenan tabata tira e tera na laira pa e biento bay cu e stof y asina e pipitanan di oro tabata wordo gara den un paña. Diabierna awor, dia 18 di juni, RAIZ ta bay tin un otro encuentro di Bienta Tera na ATIA building na Dakota di 7pm pa 9pm. Aunke e grupo di enfoke ta hobennan cu ta bay vota pa prome biaha, henter e comunidad di Aruba ta bon bini pa hunto nos saca e ideanan di oro for di e combersacionnan aki.
Na tur esnan cu no kier bay vota of ta duda ainda pa ken nan vota… No laga bo derecho di vota, ni e poder di bo voto bay perdi. Nos comunidad tin e privilegio pa laga nos bosnan resona, pa scoge e rumbo cu nos kier pa nos pais. Importante ta pa nos realisa kico exactamente nos kier, kico e futuro nobo ey ta encera. Nos kier un gobierno y un maneho transparente? Nos kier gobernantenan y representantenan integro di berdad? Nos kier pa nos aparato gubernamental traha eficiente, den union y na beneficio di Aruba? Nos kier un mihor calidad di enseñansa? Un desaroyo sostenibel pa nos isla unda bienestar y progreso ta bay man den man? Un naturalesa y medio ambiente realmente protegi…
“Hunto cu RAIZ Aruba por ta sigur cu nos lo duna oido na tur nos ciudadanonan — nos muchanan, nos adultonan mayor, tur cu ta pasando den duro aworaki, nos comunidad henter. Nos no ta laga niun hende atras. Pero pa nos por pone e solucionnan aki den practica, nos ta bay tin mester di votadornan cu realmente kier e mihor pa nos isla, votadornan consciente di loke Aruba tin mester di dje urgentemente aworaki: lidernan capaz, cu curason pa nos pais y cu kier traha duro na fabor y bienestar di nos tur.”