Bo influencia como ciudadano no mag termina despues di deposita bo voto
Como ciudadano, nos influencia den decisionnan di Gobierno y Parlamento ta mucho limita. E opinion berdadero di pueblo ta bay perdi den discusionnan toxico cu ta tuma luga riba medionan social, radio, of den priva. Di e forma aki Aruba ta kedando atras riba un punto crucial pa cualkier democracia: participacion.
Un democracia nunca lo funciona optimal si no tin un manera mas efectivo y structural pa haya sa e opinion publico autentico riba temanan importante. Pa’bo como ciudadano mester tin mas opcion cu vota 1 biaha cada 4 aña, hiba discussionnan toxico riba medio social, of manifesta dilanti bestuurskantoor. Loke nos mester ta un plataforma profesional cu ta yuda produci e opinion publico autentico di e ciudadanonan. Esaki no ta solamente valioso pa’bo como ciudadano, pero sigur tambe pa minister y parlamentarionan.
Con e plataforma profesional lo funciona?
Imagina’bo cu abo, hunto cu hopi otro ciudadano, ta ricibi un invitacion pa participa den un deliberacion riba un tema importante pa nos pais. E invitacionnan aki ta wordo haci den un forma pa yega na un grupo di ciudadano relativamente grandi cu hunto ta representativo di nos pais. Esey kiermen cu ta tene cuenta cu edad, sexo, districto, etc. Aki e opinion di cada participante lo conta igual. Hunto cu e grupo aki bo lo ricibi tur informacion relevante riba e topico. E grupo lo ricibi documentonan, presentacionnan di expertonan y stakeholders, y haya oportunidad pa haci pregunta. Despues e grupo lo delibera cu otro, pa na final haci un votacion anonimo riba e tema. Tur esaki lo tuma luga bou guia profesional pa facilita e proceso. E resultado lo ta un opinion publico autentico di un grupo representativo y bon informa.
Bentahanan
Un opinion publico autentico tin hopi bentaha. Pa cuminsa, e ta reduci manipulacion cu informacion eroneo. Actualmente, hopi ta depende riba politico, periodista of WhatsApp broadcasts pa forma un opinion. Al contrario, e plataforma ta permiti tempo, informacion relevante y deliberacion pa por forma un opinion. E plataforma lo depolitisa asuntonan controversial. Ciudadanonan cu kisas no a ricibi un invitacion pa un tema specifico, tambe lo por wak ki informacion a wordo parti cu e grupo, percurando pa mas transparencia riba e tema. Ideanan y solucionnan nobo, cu kisas minister y parlamentarionan no a considera, por wordo revela, utilisando e experiencia, conocemento y creatividad di nos ciudadanonan. E lo aumenta participacion y eleva e nivel y funcionamento di nos democracia. Y pa gobernantenan y parlamentarionan esaki lo significa cu nan lo ricibi un opinion publico autentico cu mester wordo considera prome cu tuma un decision riba e tema.
En bes di laga politica cu un monopolio riba decisionnan importante, ban sigura pueblo su voz den e decisionnan aki. Ami ta kere den un Democracia Nobo pa Aruba cu ta produci miho maneho y miho decisionnan, cu e bienestar di e ciudadano como guia. Un voto pa RAIZ ta un voto pa un Democracia Nobo.
Carlos Guiamo pa Plataforma RAIZ