KICO TA UN MORATORIO FALSO Y SU CONSECUENCIANAN PA ARUBA
RAIZ y Aruba henter a tuma nota cu den e caso IBIS, fiscal a revela cu na Aruba tin un cultura completamente robes y putri di hiba politica cu a conduci na corupcion y mal gobernacion. Aunke cu ta trata aki di e ministernan di infrastructura anterior, e echo ta keda cu nan a firma tur tereno den zona di turismo y desaroyo, perhudicando conscientemente e generacionnan actual y esnan di futuro unda empresarionan hoben ta ser limita pa NV di familiarnan di politico cu a ser bendi cu hendenan stranhero.
Awor cu nos ta na altura di locual e ministro di AVP aki a ocasiona cu partimento di tereno pa hotel y otro compania, nos ta wordo enfrenta cu ministronan actual di Gabinete Wever Croes cu ta dicidi pa sigui e trend di reparti tereno y duna permiso pa mas hotel anto cu sonrisa di triunfo riba nan cara. Nan ta hari contento y pinta plachi bunita … pakico? Pa nos no realisa cu ta miles di trahador pa un salario minimo mester bin Aruba hunto cu nan famianan? Trabou pa nos Arubianonan? Wake Up Call: dentro di poco nos por spera yeganda di un minimo di 5 pa 6 mil hende a corto plaso riba nos isla, poniendo mas presion ainda riba e.o. nos bienestar social.
Exceptionan:
Den cuadro di transparencia, RAIZ kier clarifica e Moratorio Falso cu a ser anuncia dia 17 di December di 2018 door di nos Minister di Desaroyo Teritorial, Infrastructura y Medio Ambiente.
E Moratorio Falso pa construccion di mas hotel y condos ta encera e siguiente excepcionnan:
- peticion pa construccion di hotel entrega prome cu 21 december 2018
- peticion pa construccion pa mas camber di hotel segun acto di erfpacht pasa caba na notario
- peticion pa construccion di hotel den centro di San Nicolaas of O’stad
- peticion pa construccion di hotel na Seroe Colorado
- peticion pa construccion di hotel di 100 camber of menos den waf di O’stad
- peticion pa remodelacion y expansion entrega prome cu 21 december 2018
- peticion pa remodelacion y expansion di mas camber di hotel segun acto di erfpacht pasa caba na notario
- peticion pa remodelacion pa acomodacionan di 15 camber of menos cu tin 1 aña of mas pagando logementbelasting
E reglanan stipula den e LB ta valido pa 1 año so. Cu otro palabra, practicamente tur proyecto cu a ser duna anteriormente, tin un posibilidad grandi den nos opinion pa ser construi. Esaki ta contrario na pueblo su deseo y expectativa.
Segun conclusion di estudionan conduci den pasado (Chamber of Commerce 2005, Dr. Sam Cole 2003 y Winning The Future 2011), Aruba lo alcansa su capacidad di carga den terminonan di su abilidad pa carga un crecimento continuo di turismo y su poblacion. Aruba a surpasa su recursonan cu ta rekeri un nivel sostenibel segun e studio Carrying Capacity conduci pa ATA na 2018.
E Bottom line
Conclusion: pa por cultiva un crecemento sostenibel, Aruba ya no por sigui un modelo di turismo basa riba volumen. Den un idustria cu ta crece y cambia rapidamente ta importante pa implementa un modelo di turismo nobo, (e modelo di turismo sostenibel di balor halto y poco impacto) ya cu ta esaki ta locual cu lo contribui significantemente na e diversificacion di e economia di Aruba. Ta sostenibilidad lo enrikece e bida di nos pueblo y atrae nos bishitantenan.
Mientras nos como pueblo no para firme contra desaroyo di hotel, condominium y timeshare nobo, nos isla lo sigui bira mas caro pa nos y p’e turista. Calidad di bida di nos hendenan ta baha y nos lo sigui sufri cu mas importacion di hende di afo, mas presion, mas gasto pa gobierno cual ta significa menos fondo pa dedica na e bienester social. Aruba, lanta ariba prome cu nos desaparece por completo. Ainda nos tin chens pa para e auto-destruccion cu ta tumando lugar, prome cu ta irevocablemente laat.