NOS ISLA TA NA GANGA
Bek den tempo:
Riba 15 di november 2003 nos Prome Minister e tempo ey, Sr. Nelson Oduber a manda un carta (kenmerk MA-2310) pa e voorzitter di National Tourism Council, Minister di Turismo y Transporte ing. Edision Briesen. Den e carta aki Minister President Oduber ta informa Minister Briesen cu mirando cu e rapport “Framework Sustainable Tourism in Aruba” di Dr. Samuel Cole no ta cuadra cu e plan di gobernacion, RvM a tuma e decision pa no aproba e framework integralmente.
Den e mesun carta aki Prome Minister ta informa nos minister di Turismo cu e beleid nobo ta encera cu tur inversionista mester tene na cuenta cu inversion minimal pa un camber di hotel ta U$ 300,000.00 pa cada hotelkamer. Awe, RAIZ y Aruba henter a realisa of ta realisando cu e solucionnan tradicional di hisa belasting y crea mega hotel pa asina empuha nos economia ta strategianan cu no ta funciona mas den e era moderno aki
Situacion Actual:
Inventario di All Inclusive (AI) hotel riba nos isla ta consisti di un total di 1,839 camber; RIU Palace (491), RIU Palace Antillas (480), Ocidental Grand Aruba (368), Tamarijn Aruba All Inclusive Beach Resort (297) Divi Aruba All Inclusive Beach Resort (203).
E total di hotel accommodations na Aruba ta consisti di All Inclusive (AI) 1,839 (21%), European Plan 3,421 (39%) y Time Share 3,437 (40%) cual ta suma un total di 8,697 camber di hotel segun rapport di CBA titula “The State of All Inclusive Tourism in Aruba.”
Cu yegada di e 600 hotel rooms extra (AI) esaki lo hiba e total di AI na un total di 2,439 cual ta un aumento di 32.63% di producto (AI). Esaki tambe ta un aumento di 6.9% di e total hotel accomodations na Aruba.
Average Daily Rate (ADR) / Average Room Rate (ARR) Regla di Oro:
Den industria hotelero, e Average Daily Rate (ADR) tambe conoci como Average Room Rate (ARR) ta un metrico usa den industria hotelero pa indica un average room rental per day. ADR ta un key performance indicator (KPI) di industria hotelero. Kiko ADR su rule of thumb (regla di oro) ta? Pa analisa e inversion di un hotel cual ta encera: tuma e inversion/cantidad di camber x 1 promile.
ADR Baby Beach Hotel:
Segun declaracion di Minister di Desaroyo Teritorial, Infrastructura y Medio Ambiente durante conferencia di prensa sosteni na JADS Baby Beach dialuna 18 di februari 2019, e desaroyadornan lo inverti un total di U$ 65 mln pa un total di 600 camber All Inclusive.
Usando e rule of thumb (regla di oro) anteriormente menciona, esaki ta trece un inversion di $108,333.33 pa camber multiplica pa 1 promile cual ta produci un Average Room Rate (ARR) di $108,33. Esaki ta loke Aruba kier? Esaki ta e high end all inclusive cu nos ta wardando riba dje?
Average Daily Rate Aruba:
Laga nos tuma nota di AHATA su reportahe mensual cual ta raporta riba Aruba’s Tourism Sector Performance pa luna di January 2019. E resultadonan di aña 2018 ta indica cu Aruba tabata tin un ADR di U$ 268.48 cual ta un crecemento di 11.33% compara cu 2017 di cual Aruba su ADR tabata U$ 241.14.
Nos Isla ta na Ganga:
Segun e Business Performance of AI clusters di AHATA na 2018, All Inclusive hotels na Aruba tabata tin un ADR di U$178.04. Mirando cu e ADR di Baby Beach Hotel ta pronostica un U$ 108.33 esaki ta refleha un total di U$69.71 menos compara cu e ADR actual di AI rooms. Fuera di esaki e ADR di Baby Beach Hotel ta U$ 160.15 menos compara cu ADR di Aruba pa 2018 cual tabata $268.48.
Cu otro palabra: e inversion di Baby Beach Hotel ta 1/3 di loke nos gobierno a introduci como beleid na 2003. Ademas di esaki e ADR di Baby Beach Resort ta 39% bou di e ADR di AI na Aruba y 60% bou di e ADR di nos isla.
Kico esaki kiermen? Cu ya caba nos tin un indicacion obvio di ki tipo di hotel ta bay wordo desaroya na Baby Beach. E ta bay ta un All Inclusive Hotel below scale (di menos escala), cu no ta cuadra cu e vision di un Aruba como Premium Destination. Pues, e introduccion di un otro hotel cu lo bay produci un cantidad grandi di low paying jobs (trabounan cu pago abou di minimo), cu ta bay rekeri e importacion di mas pobresa, ya cu e Arubiano mes NO ta e trahador cu ta cumbini ni interesa e desaroyadornan aki. Los di tur e consecuencianan ya conoci (social, medio ambiente, seguridad etc) cu construccion di mas hotel lo trece pa nos isla, ora nos ta papia di crecemento economico pa nos pais…
ESAKI ta e turista di “calidad” cu nos gobierno kier trece Aruba? ESAKI ta e forma con nos kier maneha nos ultimo recursonan natural cu ademas ta esencial pa atrae e turismo cu nos ta depende di dje? Beneficiando esnan cu no tin ningun tipo di interes pa preserva e identidad y bienestar di nos isla?
Conclusion:
Aruba ya no por sigui un modelo di turismo basa riba volumen. Den un industria cu ta crece y cambia rapidamente ta importante pa implementa un modelo di turismo nobo, e modelo di turismo sostenibel di balor halto y poco impacto, ya cu ta esaki ta locual cu lo contribui significantemente na e diversificacion di e economia di Aruba.
Segun e dos ministernan Oduber, tanto e NGO’s, KVK, CBA, AHATA, ATA como e pueblo Arubiano ta fout, paso ta nan so tin rason. Ta solamente e Ministernan Otmar y Dangui Oduber ta convenci cu un otro hotel All Inclusive lo trece beneficio pa Aruba.
RAIZ absolutamente ta kere den progreso pa San Nicolas, pero progreso real. Esaki ta rekeri un desaroyo sostenibel. Bendiendo nos isla na ganga sin cumpli cu deseo di pueblo nunca por conduci na progreso, solamente na deterioracion. Ta awor nos tin cu lanta para hunto y lucha pa nos derechonan, pa locual a resta di nos isla, mañan ta definitvamente laat.
