Sr. Geoffrey Wever: “NOS TA SPERA CU E BEGROTING 2022 WORDO ENTREGA NA PARLAMENTO MAS PRONTO CU TA POSIBEL.”
Segun constitucion di Aruba e Parlamentario tin dos tarea principal, esta (i) controla gobierno y (ii) ta co-legislador. Un Parlamentario ta controla gobierno door di por ehempel haci pregunta por escrito, yama un Minister pa bin Parlamento pa duna un splicacion tocante un topico di interes etc. E funcion di co-legislador di un Parlamentario ta nifica cu e Parlamentario ta aproba, cambia of desaproba leynan, pasobra leynan ta wordo estableci door di Gobierno di Aruba y Parlamento di Aruba hunto (articulo V.I Constitucion di Aruba).
Dia 7 september 2021 tabata tin un reunion den Parlamento di Aruba, y pa prome biaha un reunion a wordo presidi door di un Parlamentario di fraccion di RAIZ, pues un dia importante pa nos di RAIZ. Ursell Arends ayera a fungi pa prome biaha como Presidente di Parlamento di Aruba den e reunion cu Parlamento di Aruba unanimamente a aproba e begroting 2021 di Parlamento di Aruba y e begroting 2021 di Algemene Rekenkamer.
Begroting di Land Aruba ta wordo prepara bou di responsabilidad di Minister di Finanzas y entrega mas tarda 1 september door di Gobierno di Aruba na Parlamento di Aruba (articulo V.I2, lid 2, Constitucion di Aruba), cu excepcion di e begroting di Parlamento di Aruba, Algemene Rekenkamer y Raad van Aruba. E begroting di Parlamento di Aruba ta wordo prepara door di Parlamento di Aruba y e begroting di Algemene Rekenkamer ta wordo prepara door di Algemene Rekenkamer y e begroting di Raad van Advies ta wordo prepara door di Raad van Advies (articulo 40a, lid 1, Comptabiliteitsverordening 1989) y nan ta wordo aproba door di Parlamento di Aruba. Pa e motibo aki e Presidente di Parlamento, Mr. Edgard Vrolijk no a presidi e reunion, mirando cu e ta e persona cu ta presenta e presupuestonan den nomber di Parlamento di Aruba.
Mirando cu e fondonan pa cubri e gastonan di Parlamento di Aruba, Algemene Rekenkamer y Raad van Advies ta bin for di caha di Gobierno di Aruba, e draft begroting di Parlamento di Aruba, Algemene Rekenkamer y Raad van Advies ta wordo discuti cu e Minister di Algemene Zaken prome cu e wordo entrega na Parlamento di Aruba pa asina tin seguridad cu e begrotingen aki por wordo financia di fondonan cu Gobierno di Aruba mester haci disponibel.
Durante e reunion den Parlamento di Aruba a aproba e begroting di Parlamento di Aruba 2021 y Algemene Rekenkamer 2021 unanimamente. Como cu e begroting 2021 di Land Aruba como consequencia di COVID-19 a wordo aproba laat, esaki tin como consecuencia cu e begroting 2021 di Parlamento di Aruba y Algemene Rekenkamer 2021 tambe a wordo aproba laat. Nos ta spera cu e begroting 2022 wordo entrega na Parlamento di Aruba lo mas pronto cu ta posibel. Tambeta spera cu e begroting 2023 wordo entrega na Parlamento di Aruba no mas tarda cu 1 di September 2022.
