Sr. Geoffrey Wever: “ELIMINA RED TAPE TA UN DI E PRIORIDADNAN PA COMERCIO”
Dialuna ultimo Sr. Geoffrey Wever tabata di bishita na Directie Economische Zaken Handel en Industrie (“DEZHI”).
Den un combersacion cu directora Sra. Maria Dijkhoff-Pita Sr. Wever a haya un splicacion amplio di kico tur DEZHI su team ta haciendo pa economia di Aruba. A toca varios tema cu lo bai haya atencion di Ministerio di Asuntonan Economico, Comunicacion y Desaroyo Sostenibel durante e proximo 4 añanan.
Sr. Wever a keda contento pa wak e experticio y dedicacion di e equipo di DEZHI. Tambe a menciona di ta sinti positivo sabiendo cu lo ta bai tin un bon cooperacion cu DEZHI pa por logra metanan comun cual sigur lo beneficia Aruba.
Den e proximo 4 añanan lo enfoca riba implementacion di plan; convertiendo ideanan den resultado concreto. “Elimina e red tape ta un di e prioridadnan pa comercio por florece, esaki lo ta un di e promer projectonan pa ehecuta”, Sr. Wever a enfatisa.
E ta nos tarea pa crea un cuadro legal pa comercio por sigui haci negoshi na un forma agil y dinamico y tambe crea e cuadro legal cu ta necesario pa por diversifica nos economia y atrae e capital y expertisio cu Aruba y su comerciantenan tin mester.
