RAIZ ta extende un cordial invitacion na Aruba henter pa e simposio cu nos lo ta organisando riba diasabra, dia 9 di juni 2018 di 7or pa 10or di anochi na Universidad di Aruba.
E rason pa cual e simposio aki ta wordo organisa, ta pa celebra e promer lustro di movimento politico RAIZ. E simposio ta carga como titulo “Derecho di Naturalesa”, un punto central di nos movimento cu ta ancra den nos statuten.
Den cuadro di e celebracion aki, RAIZ kier a regala nos comunidad completo un oportunidad unico pa participa, dialoga, ser informa y wordo conscientisa ariba e topico di cuido di nos medio ambiente. E importancia di naturalesa, su derecho di existencia, e respet como tambe e responsabilidad cu cada un di nos mester demostra pa cu nos medio ambiente y nos convivencia cu otro, ta algun punto cu lo elabora riba dje durante e anochi.
Pa e dia aki nos lo conta cu presencia di diferente persona clave den nos comunidad cu tin e topico aki na pecho y cu lo fungi como orador. Banda di nos representantenan local, movimento RAIZ a invita un pionero internacional, Sra. Natalia Greene, un Ecuatoriano ehemplar cu a y ainda ta luchando incansablemente pa derecho di naturalesa na su pais y na mundo. Sra. Greene a logra pa e Derechonan di Naturalesa wordo inclui den e constitucion di su pais Ecuador por medio di “citizen participation/ activation”.
Na final di e charla, orador y representantenan di various NGO’s lo forma parti di un panel cu lo dialoga y delibera cu participacion di e publico ariba varios tema y topiconan cu ta di importancia pa percura pa e cuido di e naturalesa di Aruba por wordo efectua.
Apesar cu movimento RAIZ ta organisa e evento, politica no lo resona durante e anochi aki y tampoco despues di e simposio. E iniciativa aki ta puramente pa conscientisa pueblo y establece colaboracion duradero entre tur participante — no como medio pa ataca ningun hende, ni pa haci propaganda. Ta tempo pa actua cu madurez si nos kier supera nos mes y yuda eleva nos pais.