RAIZ na Parlamento: Vota Pa Nos Hendenan!
Ora nos ta papia di e Ley di Serlimar, nos no mester perde for di bista cu e enfoke di gobierno ta riba dos grupo den nos comunidad:
- Trahadornan di Serlimar
- Habitantenan den vecindario di dump.
E pan di e trahadornan di Serlimar no ta den wega. Nan ta ricibi “garantisa” placa for di gobierno. Nan salario ta wordo paga, e problema ey e trahadornan di Serlimar no tin. E berdadero problema di Serlimar ta e maneho y e metemento politico cu mester wordo soluciona.
Ademas, ta importante pa e trahadornan di Serlimar realisa cu nan no debe ningun ministro, cu nan trabou ta nan derecho y cu un bon maneho di nan compania ta beneficia henter e isla. Paso locual ta pasando den vecindario di dump ta un acto criminal contra nos habitantenan. RAIZ ta urgi pa un solucion rapido – un acto cu mester a tuma lugar dia bieu.
Pero e solucion aki no ta simplemente subi gasto. E solucion aki no ta djis pasa un ley y duna mas placa pa gasta. Ta inmoral pa uza e sufrimento di nos habitantenan pa kita placa di pueblo sin splica na unda e placa ta bay. Ex-presidente Obama ta yama esaki un “false choice”. Na Aruba nos ta bisa: Wega Sushi. Cu e solucion pa Parkietenbos no mester ta mara na e ley di Serlimar den e forma cu e ta hinka den otro actualmente. E parti cu ta trata e tema di Parkietenbos por bin como un ley separa.
Ban supone cu e ley aki por ta parti di un solucion. Pero con? Si ningun hende sa si esaki ta posibel, pasobra ningun hende a mira un BUSINESS PLAN. Anto nos ta papiando aki di salud di hende, sobrevivencia di nos habitantenan cu ta pega den e situacion aki pa añas anto sin un salida concreto y confiabel. Cu ki consenshi nos ta biba? E dump ta nos berguensa nacional. Anto si turismo ta asina importante pa nos, ta e mesun dump aki ta locual tur bishitante di nos isla ta mira ora nan yega cu avion, ta keiro rond y tambe ora nan bandona nos isla.
Por fabor, no uza e huma di dump como SMOKE SCREEN pa lanta placa. Mustra nos unda e placa ta bay. Duna respet na boso votadornan y boso pueblo cu merece e berdad y bon maneho. Esey RAIZ ta pidi. Pasobra si ta pasa ley y subi gasto djis pa inverti den marketing y advertising, e ora nos sa cu e salud di nos hendenan no ta wordo tuma na serio. Anto pakico sugar tax? Pa nos salud? Tereno di otro minister cu no ta papiando.
Nos Movimento ta consciente cu e situacion den e vecindario di dump ta ALARMANTE y INHUMANO. Mas ainda den e dianan aki cu biento a cay, e ambiente den e bario ta SOFOCANTE. Pueblo ta cla pa un otro Bouldin and Lawson? Ken ta bisa cu e caso aki ta diferente? Atrobe: sin un Business Plan locual cu nos ta logra ta solamente duna un credit card na Gobierno pa e sigui gasta bay mientras nos ta sofocando… te ki dia?
