RAIZ: Experiencia politico versus madurez politico
Relaciona cu e discusion huridico andando riba e validez di e mocion di desconfianza contra minister Marisol Lopez-Tromp, RAIZ su punto di bista huridico ta cu parlamento no a cumpli cu e rekisito di quorum, y mas aun ta considera cu 10 voto pro no ta suficiente pa activa e obligacion constitucional pa entrega retiro den cuadro di articulo II.2 inciso 2 di nos Constitucion. RAIZ ta reconoce e derecho di parlamento pa entrega un mocion di desconfianza sin cu e ta un agendapunt, y tambe cu un falta di confianza den e persona di e minister legalmente no ta rekeri un splicacion of motivacion. Tambe RAIZ ta compronde e liña di interpretacion cu presidente di parlamento sr. Ady Thijsen ta usa pa purba hustifica e votacion, pero RAIZ no ta di acuerdo cu esaki. Articulo II.2 inciso 2 di nos Constitucion ta rekeri “een voor ieder duidelijke uitspraak” y den concepto di RAIZ e votacion no a cumpli cu esaki. Mientrastanto tin indicacion cu a procede cu e retiro na un manera mas adecua, pero e fayonan cometi pa cu nos democracia y funcionamento di parlamento te ainda no a wordo reconoci. Ta na su luga pa den cuadro di confianza den funcionamento di parlamento recapacita riba e procedimento cu a tuma luga, y preveni pa esaki ripiti.
Locual tambe ta lamentabel, ta cu e discusion y debate publico pa gran parti a wordo limita na uno huridico, mientras etica, integridad y principionan democratico no ta hayando e atencion necesario.
Integridad no ta negociabel
Pa RAIZ, integridad no ta negociabel. Tampoco si ta trata di un of mas minister for di propio seno. Den e cuadro aki, e impasse den Gabinete Wever-Croes, cu tur e acusacionnan di falta di integridad di un minister pa otro, mester a wordo resolve algun luna pasa caba. Si un of mas minister mester a wordo retira pa sigura e integridad di gobernacion di nos pais, esaki mester a wordo ehecuta. Sin un solucion adecua pa e impasse, a permiti un situacion dudoso y no-sostenibel pa continua, resultando den un desapunto pa loke ta trata e funcionamento di nos democracia. Awo cu tin indicacion cu a procede cu e retiro di minister Lopez-Tromp, RAIZ ta enfatisa cu cualkier investigacion relaciona cu falta di integridad of casonan di corupcion den cualkier ministerio por y mester continua.
Confianza y circunstancia
Minister Lopez-Tromp a para pa su principionan te na final. Esaki ta di admira. Pero gobernacion ta rekeri confianza interno y confianza externo. Den un democracia parlamentario un minister ta depende riba confianza di parlamento. Den e circunstancia cu tin 10 di 11 miembro di coalicion cu a expresa di no tin confianza den e minister, y cu banda di esey tin coleganan minister cu no kier goberna mas cu e minister en cuestion, ta haci imposibel pa e minister sigi mantene e puesto. Esaki ta un punto valido riba su mes. E ta un principio cu ta completamente separa for di e argumentonan huridico. Den un democracia sano nos mester por determina nos posicion y responsabilidadnan a base di circunstancianan obhetivo y madurez politico.
Nos ta desapunta con parlamentarionan y ministernan, algun cu hopi y algun cu menos experiencia, a trata nos democracia creando mas duda y instabilidad den un periodo di crisis.
2021
Recuperacion for di e crisis actual ta exigi confianza den gobernacion di nos pais. RAIZ ta comprometi na ofrece Aruba un alternativa serio y capabel.
RAIZ ta preparando candidatonan den nos Academia di Bon Gobernacion caminda expertonan riba e tereno aki ta duna guia y capacitacion na nos hendenan, justamente pa garantisa entre otro cu proceso y principionan democratico ta cla y raspa. Nos ta desaroyando nos programa, y lo mantene e punto di salida cu pa RAIZ integridad no ta negociabel. Nos lo traha duro pa hunto establece e confianza necesario den gobernacion di nos pais.