Exitoso Drive Thru Koffie Morgen Di RAiZ
Diadomingo ultimo, na Koyari 28, plataforma RAIZ a sostene su prome Drive Thru Koffie Morgen pa asina recauda fondo pa campaña di eleccion 2021. Nos ta agradecido di e publico grandi cu for di trempan a bin pa busca nan snack box, koffie, tea, iced-tea y sopi.
Intencion principal di e evento tabata pa recauda fondo pa di e forma aki RAIZ por inverti den e infrastructura y logistica di nos plataforma. Un parti di nos plataforma ta e desaroyo personal di nos team pa medio di nos Academia di Bon Gobernacion, cual ta fungi como guia y preparacion di e team. Un decision necesario y sumamente importante pa eleva e calidad di gobernacion di nos pais riba un base continuo.
Gran mayoria di nos candidatonan actual y tambe esunnan nobo tabata tey presente pa gradici y tambe splica tocante e destinacion di e fondonan adkiri. RAIZ ta kere cu e manera pa cambia e relacion entre politica y pueblo ta door di comunicacion continuo y transparencia, cual ta conduci na un democracia bibo.
RAIZ kier a yama danki na tur esnan cu a presenta y cu a contribui cu compra di ticket di nos Drive Thru Koffie Morgen. Un danki especial na tur boluntario cu a yuda haci e evento aki posibel cu nan colaboracion. RAIZ ta contento cu e gran apoyo y sosten ricibi cu ta permiti nos pa sigui profila nos plataforma dinamico y presenta ideanan innovativo na comunidad di Aruba. Semper respetando opinion y identidad di cada ciudadano cu tin como meta comun: e mihor pa nos pais.
Keda pendiente pa mas informacion y e ultimo desaroyonan di plataforma RAIZ via medionan social:
