Raiz contento cu e contenido di acuerdo di gobernacion. Ta yega na acuerdo cu MEP pa formacion di gobierno 2021-2025
Diahuebs ultimo, 19 di augustus, e partidonan RAIZ y Movimiento Electoral di Pueblo (MEP) a dicidi di cera cabes y uni forsa pa garantisa e bienestar general di henter nos comunidad. Ta solamente den union y cu bon colaboracion por brinda e pueblo di Aruba un gobierno cu tin e interes di nos ciudadanonan na prome lugar respetando e derechonan di e ser humano .
Cualkier pais mester sigura su mes di un maneho basa riba bon gobernacion, transparencia y integridad di nos institutonan gubernamental, un finanzas publico responsabel, desaroyo economico duradero y sostenibel, husticia social y seguridad social garantisa, un naturalesa y medio ambiente protegi, cual ta inclui e bienestar di nos animalnan.
E retonan financiero cu nos y otro paisnan na mundo ta enfrentando por desafia nos, pero nunca mester paralisa nos capacidad pa supera e obstaculonan nos dilanti. RAIZ ta cla pa cumpli cu su tarea di sirbi nos hendenan, nos pais, manera nos plataforma a palabra for di nos inicio: cu transparencia, integridad, curason pa nos isla y cu responsabilidad.
Den cuadra di transparencia nos ta comparti e acuerdo firma cu pueblo. E puntonan inclui den e acuerdo ta entre otro:
- Integridad y Bon Gobernacion
- Derechonan social, Cuido di Adulto Mayor, Nos Mucha y Hobennan.
- Finanzas Publico
- Economia
- Husticia, Siguridad y Proteccion
- Infrastructura y Desaroyo Sostenibel
- Enseñansa, Cultura y Deporte
- Cuido Medico di Alta Calidad y Sostenibel
- Relacionnan den Reino
Proximamente ta keda na cada ministerio pa expande y elabora mas riba cada punto, y lo publica esakinan pa pueblo por tin bista riba kiko ta pasando den nan gobierno.