Den e ultimo tempo e compromiso di RAIZ pa democracia y inclusividad a bin ta resalta ora ta trata e topico di matrimonio entre pareha di mesun sexo. Como plataforma politico, RAIZ cu principionan di igualdad a nabega e proceso democratico cu un meta claro; trece e discusion di ley di matrimonio entre pareha di mesun sexo den centro di debate di Parlamento.
Dia 21 di februari ultimo, parlamentario Misha Raymond, sosteni pa parlamentarionan Raymond Kamperveen y Miguel Mansur, a manda un carta na Presidente di Parlamento pa pidi pa un fecha. Diaranson 27 di maart 2024, Presidente di Parlamento di Aruba a confirma e fecha 8 di mei 2024 unda Parlamento lo ricibi e oportunidad democratico pa vota riba e ley.
RAIZ ta respeta estado di derecho y e proceso di casacion na Hoge Raad, cual ta un proceso separa for di e ley cu lo wordo trata. E tarea di traha y dicidi kico ta ley di nos pais ta keda un responsabilidad di representantenan di Pueblo. Esey ta trabou di Parlamento y di Gobierno. RAIZ a para pa democracia y awor tin un fecha fiho pa atende cu e ley aki y tin tur speransa cu den un debate sano y democratico e balornan di igualdad y inclusividad lo sobresali.
Ta importante pa remarca cu Hoge Raad a stipula e fecha di 31 di mei 2024 como e dia cu e decision final di casacion lo wordo anuncia. No obstante, RAIZ lo sigui defende y argumenta nos sosten pa e ley y su meta na un forma responsabel y cu respet pa otro. No tin obstaculonan cu lo cambia RAIZ su determinacion y compromiso pa cumpli cu proceduranan democratico pa derecho humano.
RAIZ ta keda para pa respet mutuo y igualdad entre tur nos hendenan.
