Mocion RAIZ: cambio structural a cuminsa!
Parlamentarionan Raymond Kamperveen y Misha Raymond, ambos di Plataforma Raiz, a presenta un mocion den Parlamento diamars dia 14 di december. E mocion ta toca temanan di transparencia, medio ambiente y integridad; principionan cu Raiz a enfatisa for di e comienso.
Lamentablemente, cierto miembronan di Parlamento a scohe pa rechaza e mocion di Raiz, hunga politikeria en bes di pone ego un banda y tene e beneficio di Aruba na pecho. A pesar di esey, e mocion a pasa den Parlamento, y nos lo splica su implicacion y benificio pa pueblo di Aruba.
E mocion ta boga pa cambia e relacion entre gobierno y companianan estatal, garantisando cu nunca mas Parlamento lo keda ignora den un acuerdo tan impactante riba e futuro di nos pais. Tambe ta pidi pa haci un evaluacion tocante e efectonan ambiental cu e proyecto di Eagle LNG lo tin. Cu e ultimo punto, e mocion ta pone e prome piedra den Raiz su mision pa mehora e “good corporate governance” den gobierno y amplifica e nivel di transparencia.
E mocion den mas detayes ta lo siguiente:
1) Den forma huridicamente responsabel brinda acceso na Parlamento na e contrato y tur otro documentonan relevante encuanto e trayecto di preparacion, trayecto di negosacion y realisacion di e contrato, cu no a wordo duna na Parlamento ainda.
Splicacion: e punto ta pa pidi mas transparencia y ta evita cu Ministernan den futuro por firma contract sin cu a presenta esaki na Parlamento. Parlamento por cuestiona Ministernan y haya informacion cu no ta kibra geheimplicht (esta NDA) ni kibra statuutnan di compania estatal.
2) Efectua un “environmental and social impact assessment” encuanto e proyecto di LNG y informa Parlamento di Aruba tocante e resultado di esakinan
Splicacion: Raiz ta wak un necesidad pa haci un “environmental and social impact assessment.” E evaluacion aki lo aclarea con precies e proyecto di LNG por afecta nos medio ambiente p.e. si ta planea di rosa tereno pa instala infrastructura nobo y tambe nos ciudadano nan. Ta bon pa nota cu den pasado proyectonan a wordo para pa falta di cumplimento di un estudio similar, conduci pa D.N.M.
3) Busca conseho experto independiente tocante e posibilidadnan y realisacion di un introduccion acelera di hydrogen na Aruba, tambe considerando e contrato di LNG, como tambe pa e meta di efectua un proyecto piloto cu hydrogen durante e proximo 3 añanan.
Splicacion: LNG ta un “transition fuel.” Su funcion ta pa trece Aruba un stap mas cerca di energia renobabel. Raiz kier pa expertonan independiente duna conseho tocante Aruba su futuro cu Green Hydrogen como un fuente di energia renobabel. Den caso di conseho positivo di expertonan, Raiz a urgi Gobierno pa cuminsa un proyecto piloto den e proximo tres añanan.
4) Pa den cuadro di e maneho binidero di corporate governance, lo busca conseho huridico riba e beneficionan y desbentahanan di e structura actual di corporate governance pa loke ta trata companianan estatal y den relacion cu e tarea di control di Parlamento di Aruba como tambe e control democratico riba e forma cu Gobierno ta eherce su funcion como accionista y incorpora e conseho ricibi den e maneho di corporate governance di Gobierno como tambe den e corporate governance code cu ta den desaroyo.
Splicacion: E punto aki ta pone enfasis riba “good corporate governance” esta bon gobernacion. Plataforma Raiz kier cambia e structura cu Parlamento ta controla gobierno en relacion cu companianan estatal. Actualmente tin varios discusionnan cu semper ta wordo treci dilanti sin cu ta wordo resolvi e.o. e nivel di supervision cu Parlamento tin. E mocion aki lo ta e prome stap pa futuro ley cu lo wordo introduci door di e Minister di Integridad.
5) Den e punto ariba menciona encuanto conseho huridico ta incorpora alabes e beneficionan y desbentahenan di condiciona decisionnan strategico impactante y di duracion largo door di companianan estatal, na aprobacion di accionista (Gobierno) y/of Parlamento di Aruba
Splicacion: E punto aki ta boga pa un cambio den e relacion entre gobierno y compania estatal. Actualmente Parlamento no tin inzage den compania estatal pa evita metemento politico. Raiz ta di opinion cu aunke Parlamento no por haya acceso na tur informacion confidencial, Parlamento mester keda na altura di decisionnan clave pa monitorea con e procedura a cana. Ministernan encarga mester por divulga sikiera e esencia di e contrato pa asina Parlamentarionan por cumpli cu nan tarea di controla nos gobernantenan.
Unabes efectua, esaki lo nifica un cambio berdadero den e forma structural di gobernacion pa loke trata transparencia, y tambe den e relacion cu companianan estatal.
