Minister Ursell Arends:
‘LUNA DI OCTOBER DECRETA COMO LUNA DI ADULTO MAYOR’
Dia 1 di October ta dia internacional di Adultonan Mayor. Den nomber di Gabinete Wever-Croes 2, y tambe di parti di Ministerio di Asuntonan di Adulto Mayor, Minister Ursell Arends ta decreta henter luna di October como luna di Adultonan Mayor.
E no ta secreto cu tin un cantidad alarmante den e grupo aki cu no tin un situacion facil. E motibo nan ta varia pero ta centralisa primordialmente rond di entrada mensual, salud y falta di mobilidad. Durante campaña partido RAIZ a enfoca hopi riba e necesidad di percura cu nos adultonan mayor por tin un miho calidad di bida, y awo ta haya e oportunidad pa por eherce algun mehoracion den sea alivio fiscal, cuido integral, transportacion y mas.
Nos ta reconoce cu mester dedica mas atencion pa cuido di salud fisico y tambe mental, y pa esaki e ta importante pa tin actividadnan organisa cu ta yuda stimula y mantene e salud sano. Sr. Arends ta menciona cu esakinan mester ta mas accesibel y integra den nos maneho, especialmente pa esnan cu tin mas mester di dje.
Sr. Arends ta finalisa na manda un palabra di gradecimento y pabien na tur instancianan cu ta traha duro pa garantisa un bon calidad di bida pa nos adultonan mayor.
Den e proximo 4 añanan e Ministerio di Asunto di Adultonan Mayor lo traha duro pa duna e mas di 25,000 personanan den e grupo aki den nos comunidad un miho calidad di bida.
Aruba mester di nos tur, y sigur adultonan mayor tambe mester forma parti di e recuperacion di Aruba su economia, pa asina nos por no solamente recupera, pero tambe prospera.
