Minister Mr. Geoffrey Wever: Knowledge economy ta caminda expertonan internacional por contribui na progreso local
Si nos kier boost nos ‘knowledge economy’ nos mester por (i) atrae expertonan di afor y na mes momento (ii) educa nos mesun hendenan. Atrae experto sin ofrece un salario atractivo a contrario no ta facil, pues mester busca otro incentivonan, manera un bon expat regeling cu ta duna e expertonan aki un trato fiscal faborabel y mester percura cu nan ta haya un permiso di estadia na un forma eficiente. Ora nan dicidi di habri nan compania nan mester haya un vestigings- en directievergunning sin complicacion of tardanza.
Ora nos kier atrae experticio cu nos no tin, e meta di e knowledge economy mester ta tambe pa educa nos expertonan local, door di ofrece training riba e tereno di coding, programing, data analisis, cyber security etc. pa asina tin un kennisoverdracht na nos empresarionan local.
Innovacion y tecnologia mester wordo carga door di henter nos comunidad. Na nos hobennan por inclui esaki den varios forma den e curriculum di scol, of door di ofrece programanan atardi/anochi.
Nos a realiza cu varios empresa cu mester permiso, mester di diferente ministerio. Tin ora mester di directie economische zaken, directie volksgezondheid, brandweer, polis, directie wetgeving etc. y cada un ta depende di e otro. Minister Wever ta nota cu hopi biaha ta pidi mesun documento, pues haciendo e proceso uno mas largo complica cu e mester ta.
Minister Wever tin e placer di comparti cu e comunidad comercial cu dentro di poco lo inicia e trabounan preliminario pa centralisa e proceso pa aplica pa tur permiso pa negoshi bow di un solo capa. Solamente na un forma integra y digitalisa por acelera e otorgamento di permiso y realmente reduci ‘red-tape’.
“Comercio por considera e Ministerio di Economia, Comunicacion y Desaroyo Sostenibel como su partner strategico den logra su metanan. Aruba mester di comercio pa hiba nos GDP mas liher cu ta posibel na e nivel di 2019, y nos mester tur experticio, dinamismo y mente innovativo pa diversifica nos economia y crea cuponan di trabou nobo y duradero y bon paga pa nos hendenan”, Minister Wever a finalisa su discurso durante e evento “Immerse” organiza door di Futura.
