MIHO CALIDAD DI BIDA PA NOS PIONERONAN GRANDI
Como candidato nr. 8 di Plataforma RAIZ, mi tarea ta e bienstar di nos grandinan.
E prome puntonan cu RAIZ lo cuminsa atende ta:
- Cuido personal pa esnan cu mester di esaki
- Facilidad di transporte pagabel pa esnan cu tin e necesidad pa move rond di Aruba
- Finansas: Sigura cu esnan cu por sigui traha tin e facilidad aki, pa nan por hiba un bida confortabel despues di paga impuesto
- Bienestar General: Cuido di salud, entretenimiento, ehercicio etc.
- Integracion den economia y sociedad: Facilidad pa esnan cu por keda traha (full-time of part-time) y wordo envolvi den funcionnan den comunidad (e.o. trabou boluntario) pa asina nan por sinti nan mes util.
Pa logra esaki, cambio den leynan existente ta necesario. Posibilidadnan logistico necesario
tambe lo wordo studia.
Nos tur mester reconoce cu e bentahanan di e Aruba cu nos tin awendia, ta fruto di e trabao duro cu nos grandinan, nos pioneronan a contribui cune den pasado. Nos mester ta hopi agradecido na nan y como gratitud, haci uzo di e tremendo experiencia cu e grupo aki a gana pa nos beneficio, nos trankilidad. Awor cu nan a core nan careda di bida, nos no mester lubida nan, sino percura pa nan tin un bon calidad di bida pa nan por goza di e resto di nan añanan. Awor cu nan ta cu pensioen, no kiermen cu ya nan no ta conta mas. Al contrario, e bienestar di nos Pioneronan Grandi ta di sumo importancia pa mantene nos pueblo den sano ekilibrio — un di e puntonan importante den e programa di RAIZ.
RAIZ den e gobierno nobo lo tin como prioridad e meta pa promove un digno calidad di bida pa nos Grandinan, nos Pioneronan.
Un Aruba Nobo…
Hunto nos ta logr’e!
Ling Wong pa Plataforma RAIZ