Ley di Serlimar ta un test pa mira si berdad tin respet pa organonan di conseho y control
Pa democracia por funciona den forma optimal ta necesario y importante pa tin un sistema di “checks and balances” cu ta funciona bon y ta preveni of en todo caso limita grandemente e probabilidad cu gobernantenan ta tuma decisionnan descabeya of iresponsabel cu no ta na interes general di nos pueblo.
Den cuadro aki RAIZ ta exigi pa nos parlamento duna respet necesario na e organonan di conseho y control cu ta forma un parti asina importante di nos sistema democratico. Aki nos ta referi na Raad van Advies (RvA), Algemene Rekenkamer Aruba (ARA), Centrale Accountantsdienst (CAD) y Sociaal-Economische Raad (SER).
E conseho cu Raad van Advies (RvA) ta duna e proyecto di ley encuanto maneho di desperdicio entrega na parlamento, ta conclui cu:
Tin falta di un vision mas amplio den e problematica di maneha sushedad na Aruba.
A base di analyses di e construction proponi di e maneho di sushedad cu ta inclui den e concepto, e tin tambe pensamentonan serio pa loke ta trata:
- Consecuencianan financiero pa Gobierno y Serlimar
- E aspectonan competitivo di esakinan
- E grandura y alcance di e tareanan cu lo pertenece na Serlimar
RvA ta termina bisando cu nan por bai di acuerdo cu e meta pero no cu e contenido di e concepto di con gobierno ta pensa di yega e meta y ta duna gobierno como tal den consideracion pa no manda esaki pa Parlamento, te ora cu gobierno a tuma den consideracion e puntonan cu a wordo treci padilanti den nan conseho.
Segun nos Constitucion, parlamento ta e organo mas halto di nos pais y tin e tarea primordial pa controla gobierno. Si gobierno di su banda kier demostra respet na Trias Politica, nan mester brinda Parlamento espacio pa por eherce e papel di controla gobierno na un forma independiente y imparcial.
RAIZ kier mira si di berdad parlamento lo pasa e test cual nos ta considera e ley di Serlimar. E test ta pa mira si berdad tin respet atrobe pa instancianan manera Raad van Advies. Si esey no ta e caso e ora nos mester por acepta cu CAFT mester keda te dia Parlamento cuminsa funciona correctamente.
