Gobierno tin e responsabilidad pa nos muchanan den nos comunidad, y alabes nan tin e obligacion pa combati abuso di mucha, como tambe e responsabilidad pa prevencion, señalacion, ingreso (opvang) y tratamento.
E obligacion aki ta procede di e derechonan di mucha y ta estableci den e Tratado Internacional di derecho di Mucha. Manera ta para den art. 19, cada mucha tin e derecho di wordo protegi contra di tur tipo di maltrato y abandono fisico y/of mental, tanto na cas como pafor di cas.
Aunke prevencion ta e miho arma pa combati abuso sexual di mucha, ta necesario pa introduci un “Nationale Meldcode” pa Aruba, pa asina por tin un mihor sistema pa atende cu e casonan lamentabel aki.
Un “Meldcode Kindermisbruik” maltrato/abuso di mucha ta un plan na unda e proceso di ayudo ta wordo exactamente describi ki ora y con un profesional tin cu actua ora tin sospecho of ta kere firmemente cu un mucha a wordo abusa.
E plan aki ta encera:
- Señalamento di e problema
- Comunicacion entre e diferente instancianan y intercambio di informacion tocante di e caso(nan)
- Combersacion cu e victima/cliente
- Midimento di e riesgo pa ripiticion, e tipo y gravedad di e maltrato/abuso
- Coordinacion di e pasonan pa tuma huridicamente, socialmente y e parti di salud mental y fisico di e mucha
- E fase di tumamento di decision rapido cu unico metanan: proteccion y cuido di e mucha abusa, e detencion di e sospechoso, y e ingreso di esnan afecta
.
Ta di suma importancia tambe pa delinea den e proceso y pa cada situacion, con largo e parti di investigacion policial/hudicial, e proceso medico y e proceso di ayudo emocional/social/psychologico mester dura.
A bin constata cu tur e areanan anteriormente menciona, na e momentonan aki, no ta funcionando manera mester ta y p’esey ta necesario pa implementa e Nationale Meldcode mas pronto cu ta posibel. Aruba tin su “Meldpunt”, pero no tin un cifra real pa sostene e eficiencia di esaki, ya cu hopi caso no ta yega pa un motibo of otro na e Meldpunt aki, cual ta Bureau Sostene Mi – cu tampoco a worde regla den ley ainda.
E Meldcode ta centra su mes specificamente den mantene tur dato disponibel pa e profesionalnan y na un forma completamente confidencial. E secrecia profesional, e asina yama “beroepsgeheim”, ta keda na vigor, aunke e ley di Meldcode lo duna e profesional e derecho (aunke sin permiso di e cliente) pa haci un melding.
RAIZ ta para, no solamente pa bienestar di nos muchanan, pero tambe pa nos hobennan, nos grandinan y nos personanan – sea adulto of mucha – cu limitacion. Ser humano ta central pa movimento RAIZ y nos lo haci lo maximo pa bin cu cambionan necesario na bienestar di e ser humano. Nos lo traha duro ariba prevencion, e.o. pa agrega den e curiculo di enseñanza con pa detecta y tambe siña nos muchanan for di un edad chikito con pa nan por cuida na mes y raporta un abuso. Nos tin cu siña nos muchanan kico nan derechonan ta, como tambe inculca balor y normanan conhuntamente cu nos comunidad.
RAIZ ta condena tur tipo di abuso, sea sexual, verbal, fisico y mental, cada 1 mucha abusa ta uno dimas.