E Desaroyo Optimal di Nos Hendenan
Nos tur por mira cu COVID-19 a intensifica un instabilidad grandi den nos comunidad. Specialmente pa loke ta trata nos maneho pa esnan mas vulnerabel. E palabra ‘intensifica’ ta ilustra alabes e problema mas grandi den nos structura social.
E palabra ta indica cu e problemanan aki pa hopi tempo tabata beneficia nos minimalmente cu plannan a corto plaso. Hopi bes e plannan den maneho social tabata sirbi pa tapa buraco. Nan no ta enfoca riba e fayo structural di e problemanan mes.
Ta tiki biaha un maneho social por a brinda cambionan structural. Esaki p’e simpel motibo cu mayoria
di e plannan ta wordo kita for di mesa prome cu nan por demostra nan efectividad. Cada biaha cu un gobierno sinta, ideanan (cu kisas ta bon) ta wordo descarta simplemente paso nan ta procedente di un otro formacion politico. Fuera di esey, plannan cu ta preventivo, di cual nan efectividad ta tuma mas tempo, no ta popular.
Un pregunta cardinal nos mester puntra nos mes ta: ki consecuencia e instabilidad di maneho social aki
ta carga pa nos comunidad? Kico e ta nifica pa e desaroyo di nos hendenan si nos structura social no ta enfoca riba plannan duradero?
Un psicologo conoci, esta Abraham Maslow, a yega di introduci un piramid basa riba e necesidadnan di un ser humano pa ilustra e desaroyo optimal di un persona den un comunidad. Den e ilustracion na banda por mira cual ta e necesidadnan primario, esta basico, cu mester cumpli cu ne prome cu por yega na un desaroyo optimal di un hende den un comunidad. Si nos wak e bon, e necesidadnan basico — awa limpi, cuminda diario, un dak riba nos cabes — ta unda nos mester cuminsa pa despues nos por sigui stimula e otro puntonan di desaroyo.
Manera a wordo menciona anteriormente, cada cambio di maneho social ta crea un instabilidad. Si nos no logra crea un maneho sostenibel y duradero di e necesidadnan basico (e base di e piramid), ta cu masha dificultad nos lo yega e punto mas halto di e piramid, unda cu nos hendenan por eherce nan potencial completo.
Nos no por pidi nos hendenan pa ta e miho version di nan mes y alabes spera di nan pa contribui na nos isla di un manera innovativo, sin crea un base solido pa nan por funciona. Un maneho sostenibel y structura, unda cu a lo largo tur hende por beneficia mutuamente di un maneho social, ta e obhetivo mas grandi di plataforma RAIZ pa Aruba.
MSc. Misha Raymond di Plataforma RAIZ