Dia 23 di januari 2023 Parlamento di Aruba a aproba un ley cu ta haci posibel pa nombra un Ombudsman pa Aruba. E ley aki ta un ley di iniciativa di parlamentarionan Edgard Vrolijk (MEP), Misha Raymond (RAIZ) y Shailiny Tromp-Lee (MEP).
Pa haya sa pakico Parlamento a bin cu e ley di iniciativa aki, por lesa e articulo Een Ombudsman voor Aruba: de kunst van het haalbare (14 maart 2022).
Aruba por a tin un Ombudsman caba, ancra den nos Constitucion, pero Parlamento no a logra aproba esaki (10 maart 2022). E motibo cu e no a wordo aproba ta un diferencia di opinion entre partidonan politico riba 1 punto. Den Carlos Guiamo su opinion, partidonan AVP, MAS y Accion 21 a pone interesnan politico y partidario riba e interes general di pais door di no sostene un ley pa introduci un Ombudsman, pa motibo di no haya nan kier riba 1 punto, y crea un percepcion eroneo di e funcionamento di un Ombudsman. Den e video abou y den e articulo anterior Guiamo ta splica pakico lo tawata den interes general di Aruba pa for di aña pasa aproba e ley pa ancra e instituto di Ombudsman den nos Constitucion, a pesar di un diferencia di opinion politico.
Tambe ta splica cu Aruba tin un bon ley cu ta regla e tareanan y autoridadnan di e Ombudsman y Kinderombudsman. Tempo lo demostra cu e instituto di Ombudsman lo funciona na Aruba y cu e falta di sosten anterior cu a prolonga esaki no tawata e miho forma pa sirbi e pueblo di Aruba.
Ta premira cu durante aña 2023 un Ombudsman lo wordo nombra, segun e proceso describi den e ley cual ta a base di un proposicion di voorzitter di Raad van Advies, voorzitter di Algemene Rekenkamer y presidente di Gemeenschappelijk Hof van Justitie. Un aspecto diferente di Aruba su ley di Ombudsman ta cu e ta inclui nutsbedrijven. Pues banda di departamentonan gubernamental, pueblo lo por aserca e Ombudsman regardando e trato cu e ta haya di por ehempel WEB y Elmar tambe.
Un otro punto remarcabel di Aruba su ley di Ombudsman ta e adicion di parlamentario Misha Raymond (RAIZ) pa inclui oportunidad igual pa mucha y hoben den e tarea di e Kinderombudsman (het bevorderen van kansengelijkheid voor jeugdigen).
