Puntra un yiu di tera con e lo pinta su naturalesa, y nos lo wak nos lamanan ta aparece, nos santo blanco, nos cadushinan, nos parha nacional, e famoso dividivi y fofoti … Pero, pa un of otro motibo, nos habitat di mangelnan cu ta un di e 16 areanan di naturalesa cu ta forma parti di nos Parke Nacional di Aruba, no ta ricibiendo e mesun atencion cu e mester di dje urgentemente. Y mescos ta conta pa e resto di nos herencia natural y cultural. Pakico RAIZ kier trece e topico aki padilanti? Y no ta solamente RAIZ, pa hopi aña caba NGOs y otro activistanan ta luchando pa preserva e tiki plekinan di naturalesa cu a sobrebibi, pa nos isla no wordo completamente elimina bou di e seyo “Green”.
Ora nos wordo confronta cu plannan pa construccion di por ehempel un “Bridge” (brug, puente), – un decision cu recientemente a wordo tuma pa accentua e simbolo di un partido y no pa simbolisa nos pais – nos mester puntra nos mes cada biaha, decision tras di decision, continuamente:
- Ta permiti pa construi na e sitio? Tin un ‘bestemmingsplan’ cu ta permiti esaki?
- Tin un necesidad absoluto pa construccion di e dicho “Bridge”?
- Den caso cu tin necesidad pa esaki, e mester wordo construi na e sitio specifico ey?
- Por ehecuta e plan causando minimo daño na nos medio ambiente?
- Ki medida mester tuma pa evita cu e resto di e area di naturalesa aki wordo afecta?
Den caso cu cualkier un di e contestanan aki resulta den un “no”, e proyecto – no ta importa con impresionante y innovativo – “no” por wordo ehecuta tanten cu e no cumpli cu e 5 criterionan aki. Awor, mirando e echo cu e “Bridge” t’ey caba, enfasis mester wordo poni primordialmente riba e prevencion di dañonan adicional. Aunke cu gobierno no a cumpli cu e criterionan pa un maneho sostenibel di nos medio ambiente, e “Bridge” a wordo construi caba y no lo bay ningun otro caminda.
Locual cu si nos por haci ainda, ta conscientisa nos mes pa no sigui comete erornan cu tin consecuencianan irevocabel pa nos pais. Roza bay cu areanan di naturalesa protegi cu ta indigeno y cu por reproduci nan mes solamente si nan haya e respet y proteccion, no por wordo hustifica nunca cu gestonan politico manera plantamento di mata bay gol pa mustra “Green”. A haci investigacion cu expertonan pa verifica si e matanan aki ta pertenece na e area perhudica? Tin un bista di e impacto cu e matanan importa aki por causa na e ekilibrio ecologico di e sitio? Laga nos uza nos sinti comun un rato y puntra nos mes… Organisando un concierto mahestuoso cu batimento di musica y multitudnan grandi pa celebra apertura di cualkier proyecto gubernamental, mey mey di un pida naturalesa preserva cu ta forma parti di nos Parke Nacional, ta un decision basa riba sano huicio? Nos no a yega ni na e responsabilidad di un gobierno cu mester tin e bienestar di su hendenan na prome lugar.
Den vision di movimento RAIZ, nos nacion ta crece e dia cu nos realisa ken nos ta y kico nos tin pa gana. E dia cu nos scoge pa nos yiunan di tera, y no pa e inversionistanan cu kier biba riba custiya di nos hendenan pa por saca probecho di e producto Aruba y despues bula afo. RAIZ hunto cu henter e comunidad di Aruba, cu tin curason pa nos isla y cu ta compronde cu si nos no para firme awe pa e proteccion di nos propio habitat, nos ta bay hereda un Parke Turistico cu ni e turistanan lo kier bishita.
E dia ta yegando cu nos tin cu bay scoge entre e yenamento di nos propio saco of e recuperacion di un mihor calidad di bida pa nos tur bibando riba e pida isla aki. Cada ken mester dicidi pa nan mes na cua banda di historia nan a contribui: na e Aruba cu a wordo neglisha pa su hendenan of e Aruba cu a logra recupera y reenforsa su mes pa construi un futuro resistente.
Movimento RAIZ no ta partido chikito, e ta nobo si y e ta representa e mayoria cu ta keto, cu no ta pronkia cu bandera, ni sticker, ni tshirt… E mayoria cu ainda ta kere den e posibilidad, cu tin e speransa keto bay pa recobra e Aruba independiente y capaz cu nos tur ta carga paden, pero cu tin cu sali na cla. Hunto cu RAIZ, comunidad tin oido y bos pa participa y contribui na un bon maneho di nos pais. Aruba ban cera cabes y vota cu consenshi limpi.