Enseñansa na Aruba merece mas cu un cambio di imagen

Enseñansa na Aruba merece mas cu un cambio di imagen

Tin programanan na television unda un cas ta haya un “extreme makeover.” E cas en cuestion ta pasa door di un cambio drastico pa asina mehora e aparencia y tambe pa optimalisa su funcionalidad pa por crea un impacto postivo. Mescos cu e cas aki, nos enseñansa tin mester di mas cu bleki di verf pa por progresa.

Pakico ta crucial pa un “extreme makeover” tuma lugar den enseñansa aki na Aruba?

Den añanan ‘70 a inicia un era nobo, e era di informatica, mihor conoci como e era di computer. Loke ta caracterisa e tempo aki, ta e echo cu cada persona por haya acceso instantaneo na informacion y conocemento cu anteriormente tabata basta dificil pa encontra. Awendia un “smartphone” tin mas capacidad y ta mas liher cu e super computer cu a wordo usa pa manda e prome raket pa luna na aña 1960. Esaki ta pa ilustra con hopi nos a avansa tecnologicamente. Pero e punto di salida no ta solamente e uzo di tecnologia. E trabou di mayan ta bai exigi hopi mas conocemento den e area di informatica, analisis di informacion y “Software”.

Nos tin e responsabilidad pa percura pa nos yiunan obtene e hermentnan necesario y e habilidadnan rekeri pa nan por enfrenta e retonan nan dilanti, pa por funciona optimalmente den nos comunidad. Nos futuro generacionnan mester domina e habilidad pa por pensa critico, analisa informacion ricibi, formula nan propio opinion y siña resolve problema. Esakinan ta djies algun ehempel cu ta sali for di e “21 century skills” (e competencianan cu nos studiantenan mester adkeri pa por funciona exitosamente den futuro).

Enseñansa aki na Aruba

Enseñansa na Aruba pa decadanan caba no a mira e cambionan necesario di cual nos yiunan lo por a benificia. Nos curiculo, uno bastante anticua, no ta duna nos alumnonan e espacio pa por siña y pone cierto habilidadnan rekeri den practica. Materianan cu ta wordo ofreci na un forma no-holistico tampoco ta contribui na e desaroyo di e alumno. Djies tuma na cuenta cuanto ora nos yiunan ta pasa na cas tras di nan laptop of Ipad pa por busca cierto informacion cu nan ta haya relevante. Internet ta duna un sin fin na alternativa di topiconan cu e mucha por explora. Hopi di e informacion aki e mucha no ta haya na scol. Esaki kiermen cu na momento cu nos baha nos yiunan na scol, kico nos ta haciendo? Nos ta practicamente hibanan bek den tempo. Un realisacion cu hopi di nos sigur a experiencia.

Cambionan inevitabel cu a y lo sigui tuma lugar

Si nos analisa e cambionan cu a tuma lugar e ultimo decadanan den enseñansa, aki na Aruba nos por conclui cu e cambionan cu a ser introduci, practicamente no tabatin un asercamento na e necesidad y habilidadnan cu nos yiunan mester di dje pa por funciona den e era aki. Sin lubida e desaroyo di nos maestronan cu mester educa nos yiunan. Mayoria di e cambionan tabata estetico (bleki di verf.)

E enfoke ta basa mas riba drechamento di e apariencia di nos scolnan, cu riba e contenido di nos sistema educacional. Ningun obhecion na esaki, mantencion di e exterior tambe ta importante. Pero tempo ta bay laga nos y mester percura pa e cambionan necesario den nos enseñansa tuma lugar awe, na benificio di nos alumnonan, nos maestronan y na nos mes, ta nos comunidad tin di gana. Mester tene na cuenta si pa e cambionan aki sosode gradualmente y cu sosten di e actornan principal den enseñansa.

Maestro, Alumno y Mayor

Nos maestronan ta esunnan cu ta duna enseñansa na nos yiunan, pero kico esaki kiermen? Cu nan tambe tin e necesidad pa sigui desaroya y practica nan habilidadnan pedagogico y didactico. Na tambe mester di e guia riba e tereno tecnologico cu ta sigui desaroya continuamente. Pa nos isla por ofrece enseñansa di calidad, nos mester facilita nos maestronan cu e hermentnan adecua pa asina nan por haci nan trabou como debe ser. RAIZ ta kere den un forma di enseñansa holistico caminda e alumno ta wordo forma pa e por pensa critico. E tres actornan principal, e Alumno, e Maestro y e Mayor, ta rekeri e debido atencion y material necesario pa por traha conhuntamente na un base solido pa asina eleva e nivel di enseñansa aki na Aruba. Na final di dia, ta nos isla lo sali benificia di e decisionnan aki.

Cu hobennan disciplina y bon prepara pa por funciona optimalmente den nos comunidad, nos tur ta florece. Educacion ta un pilar crucial pa nos isla, uno cu ainda y lastimamente no a ricibi su debido atencion. RAIZ lo sigui elabora riba e topico aki, for di inicio di e plataforma, awe y den futuro.

Ivan Croes di Plataforma RAIZ