Durante prome siman di october Parlamentario Kamperveen kende ta forma parti di e comision di Energia y Minas di Parlatino, a reuni na Panama pa discuti e proyecto di e ley modelo di eficiencia energetico.
E encuentro tabata tin como meta pa sigui elabora riba e ley y promove e uzo di energia limpi y renobabel den e paisnan den region di Latino America y Caribe. E comision a logra trece un propuesta di cambio den e “Ley Modelo”, unda a logra inclui y tene na cuenta cu e Metanan di Desaroyo Sostenibel di Nacionnan Uni (SDG’s) cu ta den e tratado cu a wordo firma na aña 2015 na Paris, door di 23 Paisnan cu ta miembro di Parlamento Latino Americano y di Caribe (Parlatino).
En conexion cu e proyecto di energia eficiente, e comision a aproba un cambio pa duna incentivo fiscal na companianan cu ta tene cuenta of ta den proceso di cambio transitorio di energia sostenibel. E comision su mision ta pa sigui promove uzo di energia eficiente, implementa e cambio necesario pa energia limpi, renobabel y sostenibel. Energia cu por ta accesibel pa tur hende dentro di paisnan di Latino Americano y Caribe.
Como miembro di e comision y representante di pueblo, Parlamentario Kamperveen ta basa propuestanan riba loke ta na bienestar di henter mundo y specialmente Aruba. E direccion cu nos mester bai encuanto energia renobabel ta uno cu ta cuida nos medio ambiente, fortalece nos recursonan cu tin potencial pa produci energia y ariba tur cos, percura pa un miho futuro pa nos yiunnan y nietonan, esta Aruba su futuro generacion.
