RAIZ: Un pilar economico limpi y duradero

RAIZ: Un pilar economico limpi y duradero

Aruba tin hopi aña papiando di un pilar economico nobo. Uno cu por trece trabou pa nos hendenan, divisa pa nos pais y cu no ta dañino pa nos medio ambiente.
Na 2009 a cuminsa uza nos recursonan natural primordial, cu ta biento y solo, pa produci energia renobabel y actualmente Aruba ta logra produci 20% di su demanda na un forma limpi y renobabel. Esaki kiermen tambe cu nos tin cu importa 20% menos fuel cu normalmente ta necesario, cual ta yuda nos tene un parti di nos placa den cas. 

Pero e desbentaha di e situacion actual encuanto e molinanan di biento y e parke solar ta cu nan ta keda na San Nicolas y den e area ey mes no tin ningun usuario grandi di coriente. Esaki ta trece varios problema tecnico cu ta costa WEB miyones di florin pa domina e produccion.

Oportunidad nobo pa Aruba
Locual awendia hopi pais tin necesidad di dje ta e gas hidrogeno. Union Europeo ta wak hidrogeno como e gas di futuro y ta premira cu e industria di hidrogeno por genera 140 biyon euro pa 2030. Pais manera Alemania, Canada y Australia ya ta liderando den e industria aki, cu apenas ta den su infancia.

Hidrogeno no ta un gas desconoci, pero ta te awor a cuminsa tuma nota di su propiedadnan y uzo. E ta un gas limpi cu por ehempel barco, avion y auto por uza como fuel y aki na Aruba nos tin e scenario perfecto pa bin cu un planta pa produci e gas aki cu e enfoke riba un hidrogeno limpi y di calidad halto.

Rekisito pa produci hidrogeno limpi
Pa produci hidrogeno limpi nos mester:

Energia renobabel mane solo cu/of biento;
Awa salo;
Un waf unda barco por bin busc’e y hib’e pa e cliente na otro pais;
Un tereno industrial cu por ta safe pa tipo di proceso asina.

Manera por wak, Aruba tin tur recurso y facilidad pa logra esaki. Nos tin un parke di molina y un parke di solo cu ta produci energia limpi pa por produci e gas, nos ta rondona pa awa di lama (awa salo), nos tin un waf caba unda cu barco grandi por yega y nos tin un tereno adecua (refineria) caminda por pone un planta di hidrogeno. Sin lubida cu Aruba ta situa strategicamente perfecto pa por transporta e gas aki via barco pa diferente pais den region.

E proceso pa produccion di hidrogeno 
Pa por produci hidrogeno mester aplica e proceso yama electrolisis. Electrolisis basicamente ta un proceso unda cu e combinacion di awa salo cu coriente lo produci dos tipo di gas: hidrogeno y oxigeno. Loke nos ta interesa den dje ta hidrogeno, cual bo por warda y uza despues. E tecnologia ta existi pa hopi aña caba, pero awo ta perfeccionando e, sigur pa loke ta trata siguridad.

E produccion di hidrogeno por sosode na diferente manera. Por producie na un manera sushi (cu crudo), of por uza coriente di energia renobabel (limpi). Loke nos ta enfoca riba dje ta e proceso limpi, paso segun e tratadonan di Nacionnan Uni, pa 2050, tur pais mester ta carbon neutral. Esaki kiermen cu tur pais mester decarbonisa nan sistema di industra. Esey ta haci cu e demanda pa tipo di gas limpi mane hidrogeno ta bira grandi, pues e mercado pa hidrogeno lo keda crece.

Un planta pa produci hidrogeno na Aruba
E prome luga cu ta cuadra cu e rekisitonan aki ta San Nicolas. Eynan tin tur cuater factor menciona den cercania di otro, mester djis conecta esakinan. Tin e molinanan di biento y e parke solar. Tin e awa di lama ful rond nos isla y e waf di refineria unda tanker grandi por drenta sin problema. Loke ta keda falta ta e planta pa haci e proceso cu lo converti awa den hidrogeno. Por hasta considera uza e infrastructura existente den e refineria, cu por adapta den un planta pa produci hidrogeno.

E problema ta cu Aruba mes no ta dispone di e fondonan necesario pa bin cu un planta di electrolisis. Esey no ta nifica cu un proyecto di e magnitud aki no ta realisabel. Actualmente Union Europeo tin fondo disponibel pa tipo di proyecto asina. Loke mester haci ta, presenta un bon plan strategico y busca un partner cu tin e conocemento. Paso tur e otro aspectonan necesario nos tin disponibel. 

Kico produccion di hidrogeno localmente por nifica pa Aruba
Nos por uza hidrogeno den sector di transporte, pero tambe den industria pisa. Por ehempel, barco, avion y auto por uz’e como fuel, pero tambe fabrica manera di hero por haci uzo di dje y esey por haci Aruba atractivo pa otro sector cu ta demanda hopi energia cuminsa establece nan fabricanan kinan. Finalmente, esaki lo por haci nos independiente di importacion di crudo. 

Alabes, uzando e energia genera for di e parke di molina y di e parke solar pa produci hidrogeno, lo yuda soluciona e problemanan di produccion excesivo di energia cu WEB ta enfrenta cu ne ultimamente.

Banda di esey, un planta asina lo por bira un entidad di gobierno mescos cu WEB y Elmar, pa asina e biaha aki Aruba lo ta esun cu ta gosa di tur e beneficionan financiero. No manera den pasado, unda entidad internacional a manda tur ganashi pa exterior. Esaki lo por pusha nos desaroyo como pais pa e proximo nivel sin afecta nos medio ambiente manera un rafinaderia a bin ta haci, como cu ora bo kima hidrogeno como gas, loke ta sali afo ta awa y esaki no ta dañino pa naturalesa ni medio ambiente. 

Ademas, Aruba por exporta e gas limpi aki rond di mundo. E lo crea empleo local y hasta internacional mirando e interes cu tin mundialmente y e lo forma nos di dos pilar economico cu potencial pa bira e prome pilar economico. 

Nos di Raiz si ta kere cu esaki ta posibel cu tiki esfuerso y cu hopi bentaha pa henter e pueblo di Aruba, unda cu tur hende pa medio di trabou directo of indirecto por aporta na e desaroyo aki. Pues pais Aruba por crea entrada pa e proximo 50 añanan den un manera limpi y sin haci daño na nos naturalesa.